RSS
Deportes
FÚTBOL
Vilalba agrada a Lotina
O novo adestrador do Deportivo e os seus axudantes visitaron a vila lucense e quedaron satisfeitos das instalacións da Magdalena onde fará a pretemporada o equipo
A.M. . A CORUÑA | 27.06.2007
Miguel Ángel Lotina, novo adestrador do Deportivo, madrugou onte xunto ós que serán os seus axudantes, o técnico José Luis Ribera e o preparador físico Eduardo Domínguez, para, xunto ó asesor deportivo do presidente do club, Ricardo Moar, visitar na vila lucense de Vilalba as instalacións onde desenvolverá a concentración de pretemporada do equipo coruñés.
A representación branquiazul estivo no hotel Vilamartín, no campo da Magdalena e no parque do paseo fluvial, e interesouse polo equipamento do ximnasio do polideportivo municipal, onde tamén traballará do 18 ó 28 do próximo mes o persoal deportivista.
O novo técnico mostrouse satisfeito e receptivo á tradicional petición do Rácing Vilalbés de xogar un amigable durante a estadía. Probablemente será o día 24 ou o 25. Respecto diso, a pena deportivista da vila, a máis antiga do club de forma ininterrompida con case sesenta anos ás súas costas, agradeceulle que o conxunto coruñés retornase a esas lareiras, nos que só faltou dúas veces nas últimas dúas décadas, cando John Benjamin Toshack se fixera cargo do equipo (95/96) e quedaran na cidade herculina, e na pasada tempada, na que Caparrós pedise ir ás praias onubenses de Illa Canela.
O novo cadro técnico branquiazul xa visitara o día anterior, só baixar do avión, as instalacións de O Mundo do Fútbol en Abegondo, e xantara no Playa Club co presidente Augusto César Lendoiro. Tras a presentación todos foron ver Riazor, os seus interiores e negocios anexos do club (Deporclínica, Zona Fit, Deportienda), e reuníronse durante unha hora con Ernesto Belo, coordinador da categorías inferiores; Perico Ramallo, adestrador do Deportivo B, e outros preparadores.
Onte, desde Vilalba Miguel Ángel Lotina e José Luis Ribera desprazáronse a Alvedro para tomar un avión cara a Bilbao. O novo técnico deportivista tiña a intención de recoller a súa familia e irse uns días á Costa do Sol para recargar pilas tras a angustiosa campaña.
A hora de decidir sobre un cadro de trinta xogadores
As próximas horas son momentos de duro traballo desde os despachos da entidade deportivista. Con contrato en vigor están: Aouate, Munúa, Barragán, Manuel Pablo, Lopo, Andrade, Coloccini, Sergio, De Guzmán, Juan Rodríguez, Pablo Álvarez, Iago, Verdú, Cristian, Valerón, Riki, Taborda, Adrián e Bodipo, e os cedidos Rodri, Iván Carril, Alcántara, Momo, Pita, Rubén Castro, Mackay, Antonio Tomás, Xisco, Guirado e Pablo Amo. Son en total 30 futbolistas.
O DATO
Juanma foi presentado como xogador do Tenerife x
O ex deportivista Juanma Delgado, primeira fichaxe do Tenerife para a temporada 2007-2008, manifestou onte que "nunca" cambiou a súa forma de xogar e non cre que teña "que facelo agora" que militará nunha categoría distinta á dos últimos anos, en Primeira co Deportivo e antes co Racing. O central andaluz negou que o seu pase ó Tenerife signifique "baixar un chanzo" e subliñou que sempre que cambiou de aires antes mirou "máis o equipo, o proxecto e as aspiracións", e é que a final de contas "ó futbolista o que lle gusta é xogar", sostivo.
Algo que non puido facer con moita frecuencia na recentemente concluída temporada co Deportivo da Coruña, e que achacou a "cuestións técnicas".
BREVES
Marcelino, novo técnico do Racing
O Racing de Santander anunciou onte a contratación para a próxima temporada do técnico Marcelino García Toral, ex adestrador do Recreativo de Huelva. O preparador asturiano, que asinou co Racing por un ano, substitúe no cargo a Miguel Anxo Portugal, que presentou a súa dimisión a semana pasada, tras terminar a temporada. García Toral tamén era pretendido polo Real Betis, pero finalmente decidiuse polo club cántabro, no que militou durante a súa etapa como xogador. Hoxe será presentado como novo adestrador do Racing.
O barcelonista Giovanni van Bronckhorst está preto de fichar polo Feyenoord, tras pactar o seu futuro co club, pendente agora de executar unha cláusula que lle permita liberarse do seu actual contrato en caso de regreso ó fútbol do seu país.
O futbolista regresaría así ó seu antigo club, opción para acabar a súa carreira que xa incluíu no contrato que asinou co Barcelona este mesmo ano. Giovanni van Bronckhorst asegurouse que quedaría libre en caso de contar cunha oferta interesante de Holanda.
O lateral dereito do Getafe Javier Paredes fichou polo Zaragoza. O Getafe emitiu onte pola tarde un comunicado no que afirma que ambos os clubs chegaron a un "acordo" e que Paredes "deixa de pertencer ó equipo azulón, pasando a formar parte do equipo maño". O defensa asturiano, que cumprirá 25 anos o próximo 5 de xullo, estivo dúas temporadas no Getafe logo de pasar polo Madrid B. Na campaña que acaba de finalizar foi unha peza fundamental no equipo de Bernd Schuster.
