IU cualifica como "decreto da vergoña" a nova norma socialista

O coordinador xeral de Izquierda Unida, Cayo Lara, afirmou que a reforma laboral é o "decreto da vergoña", xa que traizoa a liña argumental socialista de non recortar dereitos sociais e supón un ataque ó "tímido estado de benestar". En roda de prensa na sede de IU, Lara volveu reiterar o seu rexeitamento a unha reforma que recorta os dereitos dos traballadores, abarata o despedimento e non vai crear máis emprego, e que supón tamén un ataque á democracia pois aprobouse sen que as institucións que representan os cidadáns poidan intervir. Ademais lembrou que vai en contra das declaracións que o propio presidente do Goberno, José Luis Rodríguez Zapatero, fixo o 16 de maio de 2009: "Mentres haxa unha maioría socialista no Parlamento de España e da UE que non aspiren e que non soñen a recortes sociais e a recortes dos dereitos dos traballadores, baixo ningún concepto".