Modernización achega 112.000 euros para difusión das TIC desde o Cpeig

A Secretaría Xeral de Modernización e Innovación Tecnolóxica colaborará co Colexio Profesional de Enxeñaría Informática de Galicia (Cpeig) "no desenvolvemento de actuacións de formación, capacitación e promoción no ámbito das tecnoloxías da información", anunciou onte nun comunicado. Así se recolle nun convenio asinado onte entre ambas as entidades e "en virtude do cal o departamento autonómico achegará 112.000 euros ó Cpeig para a realización de seis actividades": tres xornadas formativas, a elaboración dun estudo sobre a situación da sinatura electrónica, a celebración da II Noite da Enxeñaría en Informática de Galicia e a posta en marcha do Plan Navega con Rumbo.

Este último inclúe a elaboración dunha ferramenta orientada a escolares para que poidan "buscar información para realizar os seus traballos e completar o estudo das materias, divertirse xogando no tempo de lecer e comunicarse con persoas doutros lugares". Busca implicar o profesorado así como os pais e nais na navegación responsable dos escolares e "con ese obxectivo elaborará 25.000 guías para alumnos, familias, e profesorado, cada unha delas cun decálogo de recomendacións e un glosario de ligazóns de interese", di a nota de prensa. A iniciativa contempla tamén a creación dunha páxina web específica do programa, con todos os materiais impresos e un xogo.