R fai hoxe no Barco un simulacro de emerxencia

O operador galego R desenvolverá hoxe no Barco de Valdeorras un simulacro para casos de emerxencia técnica que contempla un suposto erro no nodo comarcal situado na Avenida de Galicia desta localidade ourensá. Os nodos, informa R, "son puntos técnicos estratéxicos desde onde se distribúe o sinal de fibra óptica". Dentro das tarefas de mantemento anual, o operador galego vai realizar un adestramento preventivo que simula un erro nese nodo. A actividade, que xa se fixera outros anos en Foz e Santiago, desenvolverase hoxe desde a mañá e nela "participarán uns 20 profesionais de R para realizar traballos remotos ou de campo en función das súas responsabilidades". O simulacro non afectará ós clientes do operador galego, que non notarán cambios nos seus servizos.