Tres empresas galegas optan a un premio Vivero de SIMO Network

Tres empresas galegas de recente creación, dúas da Coruña e unha de Santiago, presentaron a súa candidatura á V edición do Premio Vivero, organizado por Ifema e a fundación Fundetec no marco da Feira Internacional de Servizos e Solucións TIC para empresas, SIMO Network, co obxectivo de "ofrecerlles apoio e recoñecemento ás novas empresas españolas de base tecnolóxica que desenvolven unha actividade innovadora de calidade, con potencial de éxito no mercado", anunciou Fundetec, que non revelou o nome das firmas. Recibíronse 34 candidaturas, procedentes de 10 comunidades, e un xurado composto por profesionais e expertos no ámbito das TIC e da investigación "analizará todos os proxectos e seleccionará os gañadores, que estarán presentes en SIMO Network 2010, do 5 ó 7 de outubro en Ifema, dispoñendo así dunha plataforma de lanzamento para estas empresas e dun importante escaparate nacional e internacional para os seus produtos e servizos. Así mesmo, "Fundetec concederá un Premio Especial de 12.000 euros ó mellor proxecto da convocatoria, que será elixido polo mesmo xurado con base no grao de innovación, valor tecnolóxico e aplicabilidade e impacto no mercado do produto ou servizo presentado", indicou nun comunicado. Os nomes dos gañadores faranse públicos o venres 10 de setembro, e a entrega do Premio Especial será no SIMO.