Guillermo Rodríguez: "Pronto deixará de existir prensa en galego"

O director da desaparecida recentemente ‘A Peneira’, Guillermo Rodríguez FOTO: pereira

Como nun día da marmota en celuloide, a web do xornal A Peneira estancouse precisamente no 6 de novembro do 2010. Na portada Feijóo comenta a visita do Papa: "Día histórico" supón "un revulsivo" para Galicia, que foi "o centro do mundo" unhas horas, reza o titular. Uns minutos despois, o quincenal de Ponteareas comezaba o seu peche definitivo, que se fixo oficial esta semana.

Unha outra cabeceira en lingua galega que se borra do mapa, e xa van tres en cinco meses. A veterana A Peneira bota o peche definitivo tras unha ardua temporada de problemas, débedas, impagamentos e imposibilidades de manter o seu cadro. "O motivo é tan sinxelo como que os ingresos eran inferiores aos gastos", relata o seu director Guillermo Rodríguez quen asegura ter posto moitas veces cartos do seu peto para sacar adiante a publicación. "As publicidades e mais eu fomos o sustento", di, "e xa sabe que os xornalistas non temos moitos cartos".

Non sempre é así, pero a situación de carestía deixou primeiro o cadáver de Vieiros, con quince anos de traxectoria; despois viría A Nosa Terra, centenario ao que que non freara nin o fusilamento do seu director, Víctor Casas, no 36, e cuxo ex persoal foi o grande prexudicadaodun proceso tortuoso. Agora, tras vinte e cinco anos saíndo á rúa, a caída d"A Peneira subliña as consecuencias do gran recorte das axudas a Asociación de Medios en Galego realizado polo actual goberno da Xunta -deixara 60.000 euros para repartir entre GALICIA HOXE, Tempos Novos, De luns a venres, A Nosa Terra, A Peneira, e Vieiros-, desigual en comparación con outros. Porén, á privación económica súmaselle a falta de implicación cidadá, alimento básico de supervivencia. Desta opinión é Gillermo Rodríguez: "Non podemos dicir que a culpa sexa só da Xunta de Galicia porque moita téñena os galegos. Hai moitos que se din galeguistas, que se senten galegos, pero non fan nada por manter a prensa na nosa lingua, nin se subscriben, nin a mercan. Hai incluso moitos que se din nacionalistas, e logo compran todos os xornais en castelán. O goberno galego non ten obviamente a sensibilidade suficiente nin aposta polo galego, pero a culpa é colectiva. O de esperta do teu sono segue a ser só unha frase do himno, aquí non esperta ninguén".

Na peor crise da centenaria historia dos medios en galego, o director d"A Peneira agoira un final apocalíptico. "Os xornais en galego acabarán desaparecendo, quedaremos sen prensa na nosa lingua, a empresa editorial de GALICIA HOXE (o único diario) acabará vendo que non merece a pena", asegura. Pero, e a data? "Pronto", calcula. Que alguén nos colla confesados. "Ou mellor non".

Curiosamente, o interese pola prensa en galego era maior hai dúas décadas: "Talvez había aquela idea de resucitar algo. Eran os primeiros anos de autonomía e había interese. na política, Albor apostaba polo galego, había implicación. Estaba a xermolar algo que despois viuse que era unha planta de pouco percorrido que ninguén seguiu estercando. Hoxe ninguén está disposto nin a lembrarse dela. Nos últimos tempos, nin o Bipartito fixo por consolidar certos medios en galego e creo que foi un erro. Agora o novo goberno, co pretexto de que hai que gastar cartos en cousas positivas, elimina o apoio ao galego". Como acabará isto? "Pois se o goberno de dereitas se consolida en Galicia, o galego nun prazo de vinte anos quedará de floreiro".

Referente da prensa comarcal

Nacida en marzo de 1984, cando a estatua de Franco aínda lucía na Praza Maior da capital do Condado e só se podía publicar en castelán, A Peneira converteuse en referente da prensa comarcal con Guillermo Rodríguez de director. "Tiñamos moito entusiasmo e romanticismo -describe- e co"A Peneira queriamos poder publicar todo aquilo que nos apetecía e facelo en galego, porque a min sendo correspondente traducíanme sempre os artigos, censurábante...". Así, o antigo redactor comarcal do Faro de Vigo e La Voz de Galicia, levou a publicación ás principais cidades galegas e fíxose un oco co suplemento humorístico O Farelo, único deste tipo en Galiza. Hoxe Rodríguez reciclouse como redactor e comercial. Cóntao entre gargalladas. "Estou nun xornal que edita un amigo meu, dedicado ao deporte e á cultura, Hermes e Atenea -os deuses correspondentes- e tamén lle busco as publicidades. Co que saco, pago as débedas que me deixou A Peneira, así de sinxelo".

Guillermo Rodríguez despídese sorrinte: "Saúde aos compañeiros do GALICIA HOXE, antes aínda nos mirabamos e tomabamos unha botella de viño, agora, tal como están os tempos, nin iso". "Haberá que retomar os vellos costumes".