Pervivencia da censura

Inauguración da mostra ‘Casus belli’, coa polémica peza de Moldes pendurada dunha parede á dereita FOTO: AXENCIAS

Xa aludira a ela Conde Roa na presénta­ción da súa candidatura a alcalde, pero o concelleiro do Partido Popular (PP), Anxo Currás, convocou onte unha rolda de prensa para denunciar a exposición Casus Belli que acolle o Au­ditorio de Galicia, en Compostela, unha mostra que se centra, precisamente, nos casos de censura contra varias obras de arte. A presenza dun Cristo realizado por Manuel Mol­des, crucificado ao revés, e dun retrato de Pacheco que Currás cualificou de "pro­vocadores" e de "ferir a sensibilidade dos cren­tes" católicos, levaron o concelleiro a denunciar "a dobre moral do alcalde, que por unha banda celebra o oitavo centena­rio da Catedral e apoia a Semana Santa, e por outro tolera mostras coma esta, de moi escaso interese". Ademais, denunciou que nela se insulta tamén o ex presidente da Xunta Fernández Albor, xa que durante o seu mandato se re­tirou dunha mostra cele­brada en Pontevedra o cadro de Moldes.

A concelleira de Cultura, Socorro García, agradeceu "a publicidade gratuíta" para a exposición, e instou o concelleiro do PP para expli­car "que faría el coa mostra", se a censuraría novamente. En canto ós supos­tos insultos ó ex presi­dente, leu o texto que acompaña o cadro, no que se recolle que se retirou hai vinte e cinco anos "para non ferir a sensibilidade dos católicos, entre eles o presidente da Xunta", sen outra alusión.

Pola súa banda, o alcalde, Xosé Sánchez Bugallo, sinalou que non tivo tempo de ver a exposición, "pero dáme a sensación de que Currás demostra coñecer pouco os artistas, e fáltalle un pouco de tole­rancia e un moito de sen­tido do humor".