O "revisionismo" da teoría

Vázquez Padín é o secretario xeral de Converxencia XXI FOTO: MAURO SMYTH

"Monteagudo propón no seu informe o "bilingüismo restitutivo" como vía para fomentar o galego. O fracaso do bipartito obriga a un revisionismo teórico a quen teña a flexibilidade e a intelixencia necesarias para reflexionar sobre a realidade e fuxir da pegañenta lama do dogmatismo do BNG". Son palabras de Carlos Vázquez Padín, recollidas no seu libro Galeguismo e Liberdade. Propostas para o século XXI, que acaba de editar 2.0. O secretario xeral de Converxencia XXI apoia, así, no seu ensaio, Un proxecto de futuro para o idioma galego: unha reflexión estratéxica, un texto de Henrique Monteagudo que levantou unha intensa polémica, en especial con Pilar García Negro.

"É imprescindible a elaboración dun marco teórico de promoción do idioma galego que parta da seguinte diagnose: en primeiro lugar, que a sociedade galega é bilingüe (cunha presenza moi grande do bilingüismo diglósico); en segundo lugar, que a sociedade galega non ten nin a máis mínima intención de renunciar ao castelán; en terceiro lugar, que a clave pasa por incidir na suma de competencias idiomáticas, e non de resta, e en cuarto lugar, que cómpre persuadir á sociedade de que paga a pena potenciar a nosa lingua propia, algo do que hoxe non está maioritariamente convencida", explica Vázquez no seu libro.

"Alén diso, dous son os elementos do discurso tradicional no nacionalismo de esquerdas que, actualizados, deben ser conservados polo galeguismo do século XXI. Unha práctica social monolingüe en galego, exercida como libre escolla e non como unha obriga, é indispensable se pretendemos que na nosa sociedade se poida chegar a usar con normalidade o galego en calquera ámbito. O segundo elemento refírese á necesidade de ter presente a irrefutable realidade histórica da imposición antidemocrática do castelán en Galicia, unha realidade que non obstante xamais debe ser utilizada para xustificar o proceso inverso", engade o autor. Co gallo da reflexión sobre a negativa de Mariano Rajoy a falar galego e sobre a súa ignorancia confesa respecto do inglés, comenta que "o centralismo non só rexeita as linguas cooficiais diferentes do castelán, senón que, aínda que dun xeito máis disimulado, foxe daquelas linguas que más poden facilitar a comunicación a nivel internacional e que, no fondo, consideran rivais do castelán".

En relación co anterior, indica que "o galego cosmopolita fala galego e castelán, e é consciente da necesidade de saber inglés para relacionarse no mundo do século XXI, o galego cosmopaleto cre que Sanjenjo "mola" más que Sanxenxo e cre ademais que coa lingua cervantina podería facer negocios facilmente en Frankfurt, Toquio, Hong-Kong ou Nova York".

Vázquez Padín sitúa no seu libro como exemplos de cosmopaletos a líderes do PSOE e o PP. "Asistimos a unha escenificación de cosmopaletismo cando José Blanco chega a Palas de Rei, onde sempre falou galego, e quere demostrar o seu progreso social e a súa superioridade dando un mitin en castelán", escribe.

Máis adiante engade que "o noso presidente, Núñez Feijóo, é un bo exemplo de cosmopaletismo. Só un cosmopaleto encargaría a defensa e promoción da nosa cultura a alguén que, como o conselleiro Roberto Varela, non cre nela; nas entrevistas que lle fan fóra, evita falar de Galicia, agás para facer gala das súas políticas de limitación da lingua".