Rock xitano na Ascensión

A banda compostelá Dirty Socks actuará xunto a Jonston, Arizona Baby e Niños Mutantes o venres dentro de Pop na Ascensión FOTO: AXENCIAS

As festas da Ascensión comezarán hoxe co tradicional disparo das bombas para anunciar o comezo das festas desde a igrexa de Santa Susana, ás 12.00 horas. A partir do mediodía, varios grupos de gaiteiros realizarán os seus pasacalles, acompañados pola comparsa de cabezudos. Pola noite, ás 21.00 horas no Toural, a música chegará da man S.E.M. Big Band. Esta formación de longa traxectoria, dirixida por Suso Atanes, foi creada en 1996 como parte das actividades da "Estudio, Escola de Música". Conta con colaboradores de renome, como o pianista compostelán Abe Rábade. Deseguido, ás 23.00 horas actuará a orquestra París no Paseo Central da Alameda.

Á mesma hora, o Campus Sur reu- nirá toda a xuventude nun concerto gratuíto co grupo Emir Kusturica The No Smoking Orchestra (TNSO), unha banda de fama internacional de rock xitano creada en Saraxevo en 1980 por Nelle Karajlic e hoxe liderada polo cineasta Emir Kusturica. Con influencias da música árabe, hindú, rusa, grega e italiana crean un estilo musical propio reforzado con tecno rock.

As Festas da Ascensión deste ano inclúen dous festivais de música gratuítos no Campus Sur. O primeiro deles chegará mañá, día 13, a partir das 22.00 horas, co Santiago 40 Pop no que actuarán Giorgina, Sinestesia e Efecto mariposa. Para o venres, a Concellaría de Festas organiza o festival Pop na Ascensión. Estes concertos empezarán ás 22.00 cos grupos Dirty Socks, Jonston, Arizona Baby, Niños Mutantes e pechará a noite Sidonie.