A voz de alarma xa está lanzada. As costas galegas van soportar na próxima década unha "explosión" de novas vivendas, se se cumpren as previsións dos diferentes Plans Xerais de Ordenación Municipais -PXOM- dos concellos que ocupan os 1.700 quilómetros da costa galega. En termos xerais e para facernos unha idea rápida, a construcción crecerá no litoral, en polo menos, un 75 por cento.

Estes plans municipais son posibles grazas á Lei do solo do 2002, permisiva coa edificabilidade e prevén, todos xuntos, 600.000 vivendas en todo o literal galego na próxima década.

Aínda que a Xunta de Galicia bipartita está a traballar na próxima aprobación das Directrices de Ordenación do Territorio, un plan integrado de protección do litoral e unha axencia de protección da legalidade urbanística, as voces críticas dos ecoloxistas apuntan a que, cando estas novas normativas estean aprobadas, podería ser xa tarde. As previsións apuntan a que esas directrices non chegarían en menos de dous anos. E todo o mundo sabe que en dous anos unha construtora pode poñer moitos edificios en pé.

Onte, Greenpeace presentou o seu informe anual sobre o estado da costa de toda España e constatou a problemática xurdida en Galicia nos últimos anos. De feito, desde a ONG ecoloxista, revelan a presenza na comunidade de promotores ligados con anterioridade á construción no Mediterráneo. No seu informe sobre o litoral galego, María José Caballero, sinala que "Metrovacesa traballa na costa de Vigo, a construtora do ex futbolista Valery Karpin na Guarda, Lábaro Grupo Inmobiliario na Costa da Morte, a compañía de Florentino Pérez ACS na Mariña lucense, e tamén Fadesa, Urbis, Vallermoso... As maiores inmobilias do Estado reunidas no litoral galego". As razóns para esta chegada de capital construtor foráneo están claras: a beleza das paisaxes galegas e o baixo prezo dos terreos con respecto a outros lugares de España.

Desde a Federación de promotores de edificación e Suelo de Galicia, o seu secretario xeral, Juan José Yáñez confirma este extremo como algo normal dada a liberdade de mercado e a globalización que tamén leva a empresas galegas a construír en toda España ou no estranxeiro. "Sería inconstitucional impedírlle a ninguén que traballe aquí", sentencia.

Greenpeace considera fundadas as súas sospeitas porque xa a día de hoxe acaba de marcar 45 puntos negros das costas galegas. Como lugares problemáticos, a ONG considera tanto aqueles que están soportando unha excesiva urbanización como os lugares que presentan problemas ambientais ante a falta de depuración dos residuos e os concellos nos que se está estragando o litoral construíndo portos deportivos. Cun crecemento perigoso atopamos lugares como Viveiro -onde a Xunta suspendeu os plans urbanísticos municipais-, Ortigueira ou a Illa de Arousa, entre outros moitos.

Sobre a insuficiente depuración das augas, aparecen puntos como Baiona, Vilagarcía ou Covas en Ferrol, situación gravísima tendo en conta que hai uns meses, a Unión Europea multou a Galicia pola contaminación na Ría de Vigo.

Ademais de portos deportivos que poden deformar para sempre as praias das nosas costas, Greenpeace non esquece unha das últimas polémi cas: a situación de piscifactorías. Suspendida a de Touriñán e en estudo a de Corrubedo, especialmente grave é o caso da instalación do Rinlo, que ameaza unha das grandes xoias do paisaxe galego, a praia das Catedrais.