Mulleres na lusofonía, terceira entrega en CD de Cantos na maré

A terceira edición do espectáculo Cantos na Maré presentouse onte en Pontevedra baixo o título Mulleres na lusofonía, unha iniciativa que contará coa presenza o 16 de decembro coas artistas Dulce Pontes (Portugal), Uxía (Galiza), Ugia Pedreira (Galiza), Luanda Cozetti (Brasil), Eneida Marta (Guiné Bissau) e Amelia Muge(Portugal/Mozambique)

O proxecto de Cantos na Maré, é un espectáculo musical que se vén presentando en Pontevedra por terceiro ano consecutivo. O seu principal obxectivo é potenciar e divulgar o intercambio entre a música que se fai en Galiza e nos países de lingua portuguesa.

A actuación, que terá lugar no Pazo da Cultura o sábado 16 de decembro, está centrada na creación feminina no ámbito lusófono e contará como convidadas as creadoras Dulce Pontes, Uxía, Ugia Pedreira, Luanda Cozetti, Eneida Marta, e Amelia Muge. Os cantos destas mulleres están lonxe do patriarcal discurso musical e logran reivindicar o recoñecemento do peso da tradición cultural feminina nestes territorios. E antes de comezar o espectáculo haberá, no vestíbulo do auditorio, unha batucada a cargo do grupo de percusión Filhos de Brown.

Ó mesmo tempo desenvolverase na cidade do Lérez do 11 ó15 de decembro, a Semana da Lusofonía, en varios espazos da cidade, cuxos contidos son exposicións, conferencias literarias, gastronomía, obradoiros, proxeccións de vídeo e actuacións musicais.

No transcurso do acto de inauguración desta iniciativa cultural presentarase o proxecto documental Cabo Verde Sabí (A muller e a terra, o home e o mar), de Manuel Maseda, acompañado dunha pequena actuación do grupo caboverdiano afincado en Galiza, Batuko Tabanca.

Este encontro contará con dúas exposicións fotográficas Rostros na maré e Cabo Verde, paraíso atlántico; a conferencia literaria Há cromosomas na escrita? a cargo da escritora portuguesa Hélia Correia, dous obradoiros, -un de capoeira e outro de forró-, ademais dun concerto do dúo brasileiro Lilian França e Sérgio Tannus.