A Limia mobilízase

Un agricultor da comarca da Limia na manifestación de onte en Compostela contra a declaración de 10.000 hectáreas deste espazo como ZEPA FOTO: R.Escuredo

Máis de cincocentas persoas, na súa maioría agricultores de Limia, protestaron onte fronte ó Parlamento galego polo proxecto do Goberno da Xunta para a declaración de 10.000 hectáreas da comarca como ZEPA (Zona de Especial Protección para as aves). Os dirixentes da plataforma "ZEPA Non" fixeron coincidir esta concentración coa moción que presentou o Partido Popular no pleno contra a cualificación deste espazo como protexida para as aves, que acabou rexeitada polos votos do bipartito.

Baixo o lema "Non á ZEPA, si ao Medio Ambiente", acusaron o actual Goberno da Xunta de querer "repoboar a comarca con paxaros, botando fóra dela as persoas". A declaración de Zonas Especiais de Protección para as Aves establécese de acordo cunha directiva da Unión Europea europea co fin de preservar o hábitat ou zonas de naturais de singular relevancia para a conservación da avifauna ameazada pola extinción.

No caso da Limia en concreto, e segundo explicou o vicecoordinador da asociación ecoloxista Verdegaia, Diego Rodríguez Vieitez, "a ZEPA nace por mor dunha sentenza do Tribunal de Xustiza da Comunidade Europea pola que se obriga o Estado Español e a Xunta a protexer as aves vencelladas ás actividades agrarias". De tal xeito, establécese un importante vínculo entre o agro e as aves polo que sería contraproducente erradicar a actividade agraria da comarca.

Aínda así, algúns agricultores do Limia, ven con receo que 10.000 hectáreas do seu terreo sexan declaradas como ZEPA por medo a que se limiten as actividades agrarias e gandeiras a pesar de que, polo de agora, non hai un regulamento redactado que estableza as normas que deberán acatar.

De todos os xeitos, o presidente da plataforma ZEPA Non, Francisco Bello, vaticina que, de aprobarse esta protección impediríaselles empregar fertilizantes químicos e produtos fitosanitarios. Ademais, no poderán transitar con maquinaria polas pistas no tempo da nidificación das aves nin construir ou ampliar as naves. Porén, Medio Ambiente destacou que a da Limia e non será considerada un espazo natural protexido, xa que a Unión Europea non obriga a iso, polo que continuará coa cualificación de solo rústico de protección agropecuaria.

Aínda así, o portavoz da Plataforma ZEPA non destacou en declaracións aos medios de comunicación que o colectivo non se opón a este tipo de protección, senón a que se sitúe na Limia, tras o cal apuntou que "hai sitios e sitios en Galicia onde poñer a ZEPA sen que sexa A Limia, en sitios onde non prexudique as 22.000 persoas que viven na Limia". Na concreción atopábanse varios responsables do sindicato Xóvenes Agricultores; a secretaria xeral do Sindicato Labrego Galego, Lidia Senra; e alcaldes do PP da comarca da Limia, como o rexedor de Xinzo, Isaac Vila. Os deputados populares Diego Calvo, Ignacio López-Chaves e Jaime Castiñeira saíron ao exterior do Parlamento para saudar os manifestantes.