O leite ecolóxico, unha opción para non padecer a crise

As granxas galegas que se dedican á produción de leite ecolóxico en Galicia gozan de "boa saúde", asegura o director técnico do Consello Regulador de Agricultura Ecolóxica de Galicia (Craega), Ernesto Sánchez. Unha situación que contrasta coas dificultades que atravesan as explotacións convencionais e que se debe á súa menor dependencia de pensos e fertilizantes, que sofren un forte encarecemento.

Un factor importante que provocou, segundo recoñece Ernesto Sánchez, que moitas explotacións lácteas convencionais de Galicia se reformulen a súa orientación produtiva cara á ecolóxica.

"A súa menor dependencia dos insumos externos está provocando que se volva máis atractiva", esgrimiu este técnico quen considerou relevante o feito de que no que vai de ano sete explotacións, ata agora convencionais, solicitaron a súa incorporación produción ecolóxica.

Esta reorientación supón para as granxas que a alimentación do seu gando debe provir principalmente dos pastos e forraxes da propia explotación, nos que abonos e fertilizantes de orixe sintética están totalmente descartados. Ademais, por cada hectárea non pode haber máis de dúas vacas.

En todo caso, Ernesto Sánchez aclarou que os produtores de leite ecolóxica comparten coas granxas convencionais a baixa de prezos do leite ou alzas como o gasóleo. Con todo, ambos os encarecementos non afectaron á rendibilidade das 21 granxas que producen máis de nove millóns de litros ó ano e facturan un volume próximo ós seis millóns de euros anuais.

Precisamente, un 60 por cento do leite ecolóxico que se produce en España procede de Galicia, que concentra 1.300 das 2.700 reses de vacún dedicadas a esta actividade no Estado.