Begoña Paz publica o seu terceiro libro, 'As mellores intencións'

Begoña Paz

Un home en aparencia normal. Que agocha tras o engano quen é realmente: unha persoa incapaz de relacionarse coas demais e mudar unha vida que non lle gusta. É o personaxe principal de As mellores intencións, o terceiro libro da escritora Begoña Paz, gañador do Certame de Novela Curta Centenario da Cidade de Riveira, que Xerais editou hai pouco. As mellores intencións presentarase o vindeiro día 4 de agosto, ás 19.00 horas, na Feira do Libro da Coruña, nun acto no que intervirán a súa creadora e o director de Xerais, Manuel Bragado.

Begoña Paz (A Coruña, 1965) desenvolve nesta obra, a súa primeira novela para adultos -no 2005 publicou, para o público mozo, Norocai- temas que se podían xa intuír nos relatos do seu primeiro libro A ferida (Xerais, 2004): a dor, a insatisfacción, a violencia, o medo, a mentira, o sexo destrutivo...

"O punto de partida foi unha imaxe dun conto, no que un home atopa a súa muller morta e decátase de que non tivera unha verdadeira relación con ela. A trama de As mellores intencións, o que fai avanzar a novela, é a historia dun home que atopa unha nena maltratada e quere salvala. Pero o que me interesaba realmente era que o lector acompañase o home, un personaxe ao que lle xorde a oportunidade de mudar a súa vida, e camiña cara á salvación ou ó desastre", explicou Paz nunha entrevista.

"Un home, Gabriel, que vive afeito á pasividade, a agocharse para non expoñerse ao dano, a non tomar decisións, que de repente ten que implicarse na súa propia vida porque quere implicarse na vida doutra persoa, a cativa. Gabriel quere a nena, porque se ve a si mesmo a través dela: o neno desvaído, desprotexido e desprezado que foi e segue a ser. A cativa é unha excusa, unha oportunidade para comezar unha nova vida", engadiu.

Na novela, o amor é sempre un obxectivo inalcanzable para os personaxes. "Gabriel é capaz de ter relacións sexuais, pero non de traspasar a pel, de rachar a funda que o separa dos demais. É un home que teme as mulleres fortes, que buscan unha vida mellor activamente, aínda que o fagan do xeito errado. A nena é unha muller desvaída, a única muller que lle debe algo porque el lle salva a vida. Unha muller coa que non pode nin comunicarse. A relación entre os dous non é entre iguais, como non o é coa nai da nena, Lis, á que el despreza e ve como inferior, mentras ela tenta poñerse á altura del. Cando se decata de como é el realmente, o que non pode perdoarlle é a mentira", subliñou.

Lis, a nai maltratadora, procura, no fondo, o mesmo ca Gabriel, e faino dunha maneira semellante. "Non é el o bo e ela a mala. Os dous son persoas feridas pola vida. A xénese da nena é unha violación. Non é certo que todas as mulleres teñan un instinto maternal, e Lis non sabe como ser nai. Identifica a nena coa violencia que sufriu, e por iso a rexeita, pero non pode evitalo. Unha vítima xera outra vítima. Non é unha persoa interesada conscentemente. Busca unha oportunidade para ter outra vida, unha relación de verdade, coma el", sinala Paz.

"El, o único que lle dá a Lis é o que non lle importa nada: cartos, que os ten porque gañou un premio. Lis merca cousas, e Gabriel tenta mercar a Lis con cartos, dándolle o que Lis nunca tivera: diñeiro. Pero os cartos non salvan a ningún dos dous. El é o proveedor, pero o que realmente lle interesa é ter a Lis contenta, sedada coas compras, entretida, para poder estar coa nena. O único que desexa el de verdade mercar son xoguetes para a nena, e faino en segredo", aclarou.

A autora busca que o lector empatice cos dous personaxes. "Eu sinto compaixón por Gabriel, que non aproveita a súa oportunidade. Gústame buscar a vida que hai detrás da apariencia, ver a onde podemos chegar, e o tema das vidas posibles. Gústanme as lecturas breves, cunha linguaxe directa, a honestidade narrativa. A primeira persoa permíteme presentar a Gabriel ante o lector como é. Non escribo pensando na extensión da novela, nin a que público se dirixe. Só escribo, e trato de ver o interior dos personaxes, que temén é un modo de coñecerte a ti mesma...", concluíu.