Piden que Laxe brava sexa espacio natural de interese local

Zona da Laxe Brava, unha das últimas áreas virxes do litoral de Ribeira, co faro de Corrubedo ao fondo

Corrubedo apura os seus últimos recursos para lograr a súa salvación ante a inminente aprobación do Plan Acuícola, prevista para a última semana de agosto. O novo intento para que a última franxa litoral virxe se libre de 308.000 metros cadrados de gaiolas e cemento vén da man do BNG de Ribeira, que promoverá no primeiro pleno municipal de setembro a declaración da Laxe Brava como Espazo Natural de Interese Local. Esta figura, recollida na Lei Galega de Conservación da Natureza, evitaría o desenvolvemento urbanístico nunha zona con hábitats prioritarios e integrante na súa maior parte da Rede Natura 2000 de espazos protexidos, ademais da obriga de revisar os plans territoriais e sectoriais incompatibles, como o Plan Acuícola.

A moción promovida polo BNG pretende protexer a franxa costeira que vai dende o faro de Corrubedo ata a Punta Espiñeirido, incluíndo o promotorio de Laxe Brava e a súa contorna. Unha iniciativa que tanto dende o BNG local, como dende Adega e a Plataforma Medioambiental de Corrubedo, esperan que chegue a bo porto. "Creo que o concello, tendo nas súas mans a capacidade de protexer unha área dun alto interese paisaxístico, natural e ambiental, incorrería nunha contradición se se negase a aprobar esta moción", asegura o concelleiro nacionalista e promotor da iniciativa, Xosé Luís Groveiro.

O Concello, contrario á instalación da granxa

Tal e como recorda este edil, o Concello de Ribeira, así como os diferentes grupos por separado, presentaron alegacións ó Plan Acuícola ó considerar nocivo para a contorna a instalación das piscifactorías previstas por Pesca. Unha postura á que hai que engadir a forte oposición da poboación local, que xa demostrou o interese que ten por conservar esta zona dunha riqueza similar á da súa contorna, protexida baixo a figura dun Parque Natural e dun Lugar de Interese Comunitario (LIC) Así o cren tamén dende Adega e a Plataforma Medioambiental de Corrubedo, que ven nesta iniciativa a posibilidade de crear un espazo protexido a engadir aos que xa están nos seus lindes, no que a poboación, ademais de contribuir á súa protección, poida levar a cabo actividades sustentables que sirvan de recurso económico. Por isto, dende o BNG confían en que a iniciativa vaia adiante xa que esta declaración só implicaría a confección dun plan de ordeamento e financiamento por parte do Concello. Ademais, a pesar de que a xestión depende do consistorio, os espazos protexidos baixo esta figura son prioritarios á hora de recibir fondos autonómicos.

Dende o BNG de Ribeira e os colectivos cidadáns e ecoloxistas recordan que, aínda que o Plan Acuícola fose aprobado en agosto e o concello promovese a protección da Laxe Brava en setembro, a Administración estaría obrigada a revisar as actuacións industriais e urbanísticas sobre a zona, pola prevalecencia da figura protectora. Por iso, estes colectivos iniciarán unha recollida de sinaturas entre a poboación local para amosar o seu apoio á unha das últimas iniciativas que poden facer que Corrubedo siga sendo un paraíso natural.