A versatilidade da poesía nas aulas

Biblioteca de Intervención Social/Didáctica é o título dun novo proxecto presentado hai pouco pola Editorial Galaxia que, despois deste breve tempo transcorrido, xa comeza a dar interesantes froitos. Coñecemos a Antonio García Teijeiro pola súa dobre faceta de ensinante e creador literario para os máis novos, dous universos que, no seu caso, están perfectamente imbricados; dous espazos que se basean e conviven na necesaria reciprocidade que o escritor lles tan outorgado desde hai moitos anos. Que o seu labor creativo teña chegado a numerosos idiomas, estea incluído en listas como as do IBBY (International Board on Books for Young People, é dicir, Organización Internacional para o Libro Xuvenil), que sexa unha referencia na publicación especializada CLIJ (cadernos de literatura infantil e xuvenil) e teña acadado prestixiosos recoñecementos literarios, non é froito da casualidade. Traballo, constancia e a sabedoría de coñecer a cerna dos lectores que se inician no fascinante mundo da literatura semellan ser os trazos esenciais deste narrador, ensaísta e poeta que desde hai máis de vinte anos mantén un feliz contacto co seu público lector.

García Teijeiro regresa á actualidade da didáctica la literatura galega con este libro (axeitado para instruír e, esencialmente, lúdico) que é froito da experiencia mais que, con seguridade, valerá para moitas outras persoas do eido do ensino que atoparán aquí ideas, actuacións, fórmulas, traballos? que servirán para achegar a poesía ás aulas. É manifesta a dificultade que existe, en xeral, para que a lírica se abeire aos máis pequenos, un xénero que se presume difícil e complexo para nenos e nenas. Quizais os problemas sexan outros, derivados do descoñecemento das ferramentas para a captación da vontade e atención e mesmo para achegar ese mundo poético de xeito agradable e divertido. É así que este "A poesía necesaria" abeira en dous bloques (primerio a reflexión sobre a poesía e a continuación as técnicas de traballo na aula) a experiencia dun labor e as versátiles posibilidades arredor da poesía sobre a que hai "un gran descoñecemento dos seus efectos beneficiosos ao aplicala na clase".