Amnistía Internacional: Galicia suspende en dereitos humanos

Sesenta anos despois da adopción da Declaración dos Dereitos Humanos por Nacións Unidas, o suspenso é xeneralizado en todo o mundo. O balance: un fracaso. Na actualidade, polo menos 81 países aínda manteñen prácticas de torturas ou malos tratos ás persoas, en polo menos 54 son sometidas a xuízos sen as necesarias garantías e noutros 77 non existe a liberdade de expresión. Un suspenso do que non se libra Galicia. Cómpre, pois, facer os deberes. É, ademais, o momento de que "os gobernos do mundo pidan desculpas por seis décadas de fracaso e renoven o seu compromiso para obrar melloras concretas".

Así o denunciou onte en Vigo a sección galega de Amnistía Internacional na presentación do seu Informe 2008: O estado dos dereitos humanos no mundo. Neste contexto, os membros de AI emprazaron a Xunta e os concellos galegos a elaborar "un plan de protección e promoción dos dereitos humanos" como o que xa lle presentaron hai 6 meses -e que agardan que se faga realidade-. Un plan que "inclúa medidas sobre racismo, inmigración e trata de persoas; violencia contra as mulleres, educación en dereitos humanos, formación da Policía autonómica e local e solidariedade coas vítimas de violacións de dereitos humanos", explicou a responsable de Relacións Institucionais de AI en Galicia, Yolanda Román, quen afirmou, na presentación do informe, que "o ano 2007 se caracterizou pola impotencia dos gobernos occidentais e a ambigüidade das potencias emerxentes" para atallar "algunhas das peores crises mundiais en dereitos humanos".

Desigualdade, impunidade e inxustiza pintan o mundo hoxe

A maior ameaza, engadiu Román, "para o futuro dos DDHH é a ausencia dunha visión compartida e un liderado colectivo". Porque, segundo denunciou a representante de AI, "a inxustiza, a desigualdade e a impunidade son hoxe as marcas distintivas do noso mundo".

Pola súa parte, o voceiro da sección galega de Amnistía Internacional, Alberto Estévez, incidiu nas materias pendentes do goberno galego en materia de dereitos humanos. Así, en declaracións a GALICIA HOXE, explicou que "en plena campaña electoral", en outubro do ano pasado, saíron "á palestra para dicirlles ós partidos galegos que se comprometesen a elaborar plans municipais de dereitos humanos. Algúns dixeron que si, pero aínda non está en marcha ningún".

"En novembro mantivemos unha entrevista con Presidencia e Vicepresidencia para formular este asunto, e vimos unha boa disposición ó diálogo, un primeiro contacto positivo". Con todo, engade Estévez, "xa pasaron seis meses, xa é hora de que adopten esas medidas".

Por outra banda, e ademais destas demandas co obxectivo dun plan específico en DDHH, desde AI reclaman tamén da Xunta un maior compromiso no día a día. "Interésanos -explica- que o presidente Touriño e o vicepresidente Quintana, cando saian ó estranxeiro, non deixen fóra da maleta os dereitos humanos". Por exemplo "cando se viaxa a países como Cuba, onde a frustrigación ós críticos co sistema está moi presente, ou a México, onde existe un sistema xudicial absolutamente ineficaz e corrupto". Trátase, indicou, de incorporar os DDHH como compromiso na axenda política. "Igual que cando veñen investidores chineses, como viñeron en decembro, se lles pon unha alfombra vermella, hai que lembrarlles que se comprometeron, de cara ós Xogos Olímpicos, a deixar de frustrigar a prensa e acabar coa pena de morte. Porque os chineses teñen a medalla de ouro de execucións, con 8.000 anuais".

Desde Madrid, onde o informe se presentou de xeito paralelo, a presidenta e o director de AI, Itziar Ruiz-Giménez e Esteban Beltrán, consideraron que son os países máis poderosos os que deben dar exemplo. Beltrán indicou que Estados Unidos ten que pechar a prisión de Guantánamo e os centros secretos de detención para que os encarcerados sexan xulgados ou liberados.

Europa, "cómplice" das violacións de dereitos en EEUU

Na súa opinión, unha das "promesas incumpridas" da Declaración de 1948 que resulta "totalmente inaceptable" é a tortura, unha práctica que sempre foi "a máis clandestina das violacións dos Dereitos Humanos" e que hoxe "corre o risco de converterse en aceptable".

Beltrán destacou a actuación de Estados Unidos neste aspecto e a práctica da tortura que exerce no centro de detención de Guantánamo e os voos secretos da CIA para o traslado a cárceres doutros países a arrestados por terrorismo, algo ao que, segundo denunciou Ruiz-Giménez, contribuíron os países europeos polo seu "silencio e pasividade".