Xoves 29.07.2010
| Actualizado 18.52
Hemeroteca web
|
RSS
|
A multinacional acuícola Stolt Sea Farm solicitoulle a principio de mes ó organismo público Augas de Galicia o permiso de verteduras para dúas granxas postas en marcha hai máis de quince anos. Así o deron a coñecer onte os veciños da localidade de Quilmas (Carnota), tras ter acceso ó documento nos que a firma luxemburguesa solicita autorización para as piscifactorías de Quilmas e Lira, ambas as dúas no concello de Carnota, e que estivo a exposición pública ata o día 25 deste mes para poder presentar calquera tipo de alegación.
Tal e como se recolle no texto, Stolt reclámalle a Augas de Galicia un permiso de vertedura de máis de 48 millóns de metros cúbicos ó ano para augas residuais industriais e fecais e case 2.000 m3 de fecais xeradas nas instalacións de Quilmas. A este respecto, a empresa engade que as augas fecais son depuradas nunha estación depuradora de augas residuais e nunha fosa compacta. En canto á de Lira, Stolt Sea Farm reclama unha vertedura de 138.758 m3 ó ano para os residuos industriais e máis de 3.500 m3 para as fecais depositadas na ría de Lires e que son depuradas previamente nunha fose séptica.Ante esta situación, o voceiro da Plataforma de Quilmas contra o Plan Acuícola, Xosé Manuel Casais, expresou a indignación dos veciños tras corroborar que a empresa "leva envelenando impunemente a costa dende hai 20 anos e agora seguirao a facer, pero con permiso". "Vaise regularizar unha actividade ilegal", apuntou Casais, quen anunciou mobilizacións dos veciños da Costa da Morte contra estes permisos, así como recursos pola vía xudicial, tras o fracaso administrativo. Adega xa puxo en coñecemento da xustiza que as 27 piscifactorías presentes no litoral galego non contan con permiso de vertedura e as augas que botan directamente ó mar son 138 veces máis contaminantes que os mínimos legais permitidos. "Ninguén controla a calidade das augas que denvolven ó mar", apunta.
Adega: "Ningunha poderá verter"
