Unha marea humana a prol da defensa dos océanos do mundo

Asociacións ecoloxistas galegas culminarán hoxe a Semana Galega do Medio Natural cunha concentración na Praza das Praterías, onde lanzarán unha "mensaxe de alarma e esperanza" á sociedade galega.

A iniciativa, organizada pola Asociación para a Defensa Ecolóxica de Galicia (Adega), aspira a concienciar á poboación da necesidade de reivindicar un uso sostible do bosque galego e de reducir as emisións de carbón por parte das empresas térmicas de Galicia, por ser causante de "gran" parte das emisións de gases de efecto inverna­doiro.

Na xornada de hoxe, Día Mundial dos Océanos, varias asociacións ecoloxistas e sindicatos levarán a cabo unha concentración a partir das 12.00 horas baixo o lema Por un futuro sen carbón, por unha costa sen cemento e lonas negras en Praterías. Durante a lectura do manifesto, que correrá a cargo do escritor Xurxo Souto, os ecoloxistas farán un chamamento á sociedade e ás administracións para "actuar" sobre dous dos "principais" problemas ambientais en Galicia, como son o uso do carbón como combustible e a degradación dos mares.

O coordinador organizativo de Adega, Martiño Fiz, explicou que durante a concentración tamén trasmitirán unha mensaxe de "alarma e de esperanza" aos galegos sobre o estado dos mares xa que, ao seu entender, están "seriamente" ameazados pola "irresponsabilidade dos que o ven como unha fonte ilimitada de recursos para explotar". Por iso, reclamou a elaboración "urxente" dun plan estratéxico contra a contaminación mariña no que participen todos os axentes implicados, cuns obxectivos "concretos e temporalizados" para "minimizar" o risco das verteduras accidentais e as mareas negras.

Tamén defendeu a protección "efectiva" dos ecosistemas costeiros fronte ao urbanismo "especulativo e depredador", e esixiu a retirada do Plan Acuícola por ser a "principal ameaza ao patrimonio natural e cultural do litoral galego", concluíu.