Internacionalización do galego

Xa o temos dito noutras ocasións, mais resulta sempre interesante insistirmos no tema: ¿imaxinan vostedes o que faría Cataluña e os cataláns se o idioma galego e a cultura galega fosen deles? ¿Tería dito Steiner o que dixo se soubese que o idioma galego é o pai e a nai, a matriz, do idioma portugués? Lembrarán vostedes a coñecida afirmación de Castelao no "Sempre en Galiza", referíndose ao idioma galego: "Fillo do latín, irmán do castelán e pai do portugués". E engade o mestre: "O galego é un idioma extenso e útil, porque -con pequenas variantes- fálase no Brasil, en Portugal e nas colonias portuguesas". E así é. O idioma galego -con pequenas variantes; mínimas variantes, caso do brasileiro culto- fálase hoxe en 5 continentes, é lingua oficial de 8 países e é o cuarto idioma máis falado no mundo despois do castelán: 200 millóns de falantes. E un dato ben curioso: no Brasil hai máis de 30 millóns de internautas. ¿Teñen feito algo os Gobernos galegos, do signo político que for, sobre a internacionalización da cultura galega -e en primeira instancia da Literatura Galega-, a partir do "ser" universal do idioma propio de Galicia? Non. Nin o teñen feito nin, polo que se ve, o pensan facer. "Almas rendidas", dicía Ortega. ¿U-la creación do Instituto Rosalía de Castro? ¿Para cando chegue o AVE? Practicamente todos os gobernantes que tivo o noso "oculto" país desprezaron abertamente a posibilidade de instalar o idioma galego no mundo, á par do portugués, seu fillo. ¿Cabe tanta ignorancia política e cultural? ¿Por que tanta orelleira? ¿Alguén pensa seriamente no futuro do noso idioma e da nosa Literatura, da nosa cultura, no plano internacional? O idioma galego, con pequenas variantes, ten 200 millóns de falantes no mundo. ¿Saben os nosos políticos o que significa isto? ¿Hai vida cultural intelixente na política galega? Produce arrepío pensar e comprobar que estamos perdendo o tempo miserabelmente, mentres a obra de arte "mil veces superior" ao Pórtico da Gloria (Castelao dixit) vai camiño do que vai.