Vicepresidencia amplía o transporte adaptado a todos os municipios

Vicepresidencia da Xunta investirá 67,5 millóns de euros para estender o Servizo Galego de Transporte Adaptado, o coñecido como 065, ós 315 municipios galegos, cunha flota integrada por 122 vehículos que poderán prestar servizos a 100.000 usuarios a finais deste ano.

Así o explicou onte nun comunicado, no que engade que o Consello da Xunta tratará hoxe a tramitación do expediente de gasto relativo á contratación da xestión, en réxime de concesión, deste servizo.

Trátase de lle dar continuación ó proxecto iniciado no mes de decembro do ano pasado coa posta en marcha da primeira fase deste servizo, que conta actualmente con 44 vehículos operativos en 130 concellos e unha poboación potencial usuaria que supera as 22.000 persoas. O 065 é un instrumento "fundamental" da política de accesibilidade ós servizos e instalacións do Sistema Galego do Benestar, en que os servizos "se adaptan ó país, e non o país ós servizos". A iniciativa do Servizo de Transporte Adaptado pretende vencer as dificultades que impón a dispersión da poboación galega en 35.000 núcleos diferentes, para que todas as persoas dependentes e con discapacidade poidan gozar do mesmo dereito de acceder ós servizos de saúde, sociais e ter unha vida autónoma. l