Xoves 02.09.2010
| Actualizado 18.54
Hemeroteca web
|
RSS
|
En outono, nunha época atípica, minguada pola crise e practicamente coa metade de expositores botou a andar a XXXI edición da Feira Internacional Semana Verde de Galicia despois dun ano convulso na "catedral do agro" de Silleda.
Para escenificar a normalidade institucional, o presidente da Xunta, Emilio Pérez Touriño, foi o encargado de dar o disparo de saída garantindo o compromiso do seu Goberno co futuro e "coa viabilidade da Semana Verde e da fundación co padroado que a leva adiante", que precisamente agora está nas mans do conselleiro de Presidencia José Luis Méndez Romeu tras a baixa do histórico José Maril.
"A Xunta de Galicia quere proxectar cara ao futuro esta traxectoria de éxito, apostando por unha feira que, partindo das súas capacidades, fortalezas e potencialidades, saiba aproveitar as oportunidades para seguir sendo un referente no sector agropecuario e agroalimentario", resaltou o mandatario, facendo fincapé nos "pasos importantes nesta nova etapa de fortalecemento da Semana Verde de Galicia" coa modificación dos estatutos da fundación e a toma de posesión do novo padroado, coa decisión de "crear unha estrutura de dirección altamente profesionalizada".
Tras sinalar que a Xunta ten un compromiso financeiro que permitirá levar adiante os compromisos feirais deste ano e do vindeiro exercicio, o presidente galego resaltou que o Goberno galego está a garantir "a continuidade da fundación Semana Verde de Galicia e con elo a viabilidade da Feira Internacional e do resto de eventos que organiza a fundación".
Na súa intervención, Touriño referiuse ó conflito do sector lácteo e subliñou que o Goberno galego entende e comparte a preocupación dos gandeiros e está "traballando a fondo" na activación de "medidas e programas que permitan salvar as dificultades e conseguir a estabilización" dun eido de importancia vital para Galicia. "Non os imos deixar na estacada e non os estamos a deixar na estacada", insistiu.
O máximo mandatario galego indicou que cómpre "traballar na dirección na que o estamos a facer", en relación coas medidas adoptadas polo Executivo autonómico para introducir transparencia na negociación dos prezos. Pérez Touriño destacou que ademais das iniciativas do Goberno galego, debe actuar o Goberno central, e rexeitou as solucións locais. Nese sentido, sinalou que é necesario activar no marco da Unión Europea "medidas concertadas" que permitan "unha actuación extraordinaria no mercado" para darlles saída aos excedentes de produción para que as empresas non presionen a prol da rebaixa dos prezos. Paralelamente, o xefe do Goberno autonómico sinalou que o Goberno galego continuará actuando para facilitar a negociación dos prezos mediante medidas como o contrato homologado.
Os traballadores ollan cara a adiante e non queren nin falar da "crise"
Os traballadores da Fundación Semana Verde e do recinto feiral de Silleda foron os alicerces das protestas pola situación vivida nu- nha dura tempada de crise, marcada pola "blindaxe" do sempiterno José Maril. Agora, semella que a Xunta colleu as rendas deste magno proxecto da denominada catedral do agro, e as augas intentan volver á súa canle malia que nin os departamentos de Presidencia nin o de Medio Rural se poñen de acordo para deseñar un plan de viabilidade moito máis estable.
Os empregados no momento actual non queren nin oír falar desta crise e aseguran estar "completamente centrados" en garantir que a XXXI edición da Feira sexa perfecta ata o domingo. Segundo o delegado da CIG, Miguel Luis González, "estanse cumprindo os prazos e semella que isto vai funcionando, así que non hai nada que dicir". O sindicalista, iso si, recoñece que estas datas de novembro para celebrala "non son as mellores, pero non somos quen de dicir se é positivo ou non facela".
Megodeza, a máis innovadora A visita mesturouse coas protestas do 112 e das fundacións comarcais
Mentres o presidente da Xunta, Emilio Pérez Touriño, pronunciaba o seu discurso traballadores do Servizo de Urxencias do 112 exhibiron unha pancarta co lema: "112 solucións". Ó mesmo tempo, fóra do Auditorio, outro grupo de persoas pedían estabilidade laboral para os traballadores das fundacións comarcais.
Unha vez finalizou o acto de i- nauguración, o mandatario galego participou na entrega de premios do Día Internacional do Agricultor 2008, que agasallou a vinte produtores de Galicia, Portugal e mais Asturias.
Unha vez terminado este acto, o presidente, acompañado do responsable de organización da feira, José Maril, realizou un percorrido polos diferentes "stands" do certame, que se prolongará ata o domingo, no que tamén participaron a alcaldesa de Silleda, Paula Fernández, o responsable da Fundación Semana Verde, José Luis Méndez Romeu, ou o conselleiro de Medio Rural, Alfredo Suárez Canal, entre outros.
Unha planta prototipo de investigación en sistemas de refrixeración, presentada pola empresa Megodeza S.L.U, de Lalín (Pontevedra), obtivo onte pola tarde o Gran Premio Especial de Innovación Tecnolóxica Semana Verde de Galicia. Ó concurso, organizado por Caixanova e a Fundación Semana Verde, presentáronse 27 proxectos, valorando o xurado as mellores iniciativas destinadas a optimizar os recursos rurais.
