Prospera entre apupos a moción de censura contra o alcalde do Porriño

A moción de censura contra o alcalde do Porriño, Raúl Francés, do BNG, prosperou hoxe cos apoios dos concelleiros do Partido Popular, Independentes por Porriño e Cidadáns por Porriño (CxP), esta última formación do novo rexedor, Nelson Santos.

A sesión plenaria, que durou preto de dúas horas, iniciouse ó mediodía cunha importante presenza de público no salón de plenos do Porriño, que coreou consignas e realizou apupos contra os concelleiros que apoiaron a moción de censura.

As reprobacións mantivéronse constantes durante toda a sesión, salvo nos minutos que ocupou o alcalde saínte para explicar o posicionamento do seu grupo, o BNG.

O respaldo a esta moción supón configurar un novo Goberno de centro-dereita no municipio e tamén pon as bases para que as tres forzas que subscriben o documento se alíen e se fundan nunha soa formación de cara ós próximos comicios.

A do Porriño é a undécima moción que se consuma en Galicia desde as eleccións municipais do 2007 e a cuarta na provincia de Pontevedra, tras os casos recentes de Mos, Gondomar e Silleda.