Xosé Manuel Beiras: "Fun obxecto de censura política"

Virxilio Costas FOTO: GH

O político Xosé Manuel Beiras ratificou onte a información publicada por este xornal, na que se asegura que a súa voz foi silenciada dentro da Radio Galega (RG). Beiras, que onte, finalmente, recibiu unha explicación da súa exclusión, por parte do director da RG, Virxilio Costas, fala directamente de censura política. "A explicación que se me deu non se corresponde coa realidade. As miñas fontes indícanme que houbo unha censura política por parte de Antón Losada", asegura Beiras. Segundo as súas palabras "as cousas son as que conta Galicia Hoxe e agora espero que todo isto se clarifique dentro do BNG".

En canto á Radio Galega, a súa dirección asegurou onte, mediante un comunicado, que Beiras, a día de hoxe, segue estando na nómina dos personaxes que participan en "A Rebotica", malia que a semana pasada non interveu ningún día. A emisora considera "totalmente falso que comisarios políticos da UPG veten a Beiras", tal e como explicou na edición do martes este xornal.

A explicación ó silencio de Xosé Manuel Beiras en A Crónica reside, segundo a dirección, "na nova temporada que trouxo consigo a incorporación de novos tertulianos, a baixa doutros e a creación de novas seccións".

Deste xeito, "abriuse un novo espazo en A Crónica que se chama "A Rebotica" no que lle propuxon a Xosé Manuel Beiras a súa participación, proposta que foi aceptada", afirman.

A Radio Galega lamenta que "Galicia Hoxe non contrastase a nova". Ademais, asegura que "é falso que algún xornalista dese periódico intentase falar co director da Radio Galega onte pola tarde (referido ó martes). Estaría ben, continúa o comunicado, que, "polo menos, os lectores de Galicia Hoxe puidesen coñecer a versión da dirección da Radio Galega".

Finalmente, a Radio Galega, baixo a dirección de Virxilio Costas, asegura que non vai entrar a xulgar se as informacións deben elaborarse con fontes obtidas de "numerosos chats" e sen contrastar. Tamén lamenta que se utilicen estas informacións pouco contrastadas para dirimir diferenzas políticas, respecto ás cales a emisora pública é totalmente allea".

UPG: "Non somos partidarios de ningún tipo de censura"

Pola súa parte, o secretario nacional de Organización da UPG, Roberto Vilameá, asegura que a UPG non ten ningunha responsabilidade na non continuidade de Xosé Manuel Beiras na RG. Vilameá explica nun comunicado que o seu partido "non é partidario de ningún tipo de censura e que, ademais, a UPG non ten ningunha responsabilidade política na dirección da Radio Galega. A UPG -continúa- defende o principio do respeito escrupuloso ao pluralismo político, respeito que, lamentabelmente, non sempre se cumpre nos medios de titularidade pública no noso país", segundo pon de manifesto no comunicado.

A información sobre o "silencio de Beiras" "non dá, porque non pode dalo" ningún dato obxectivo e verificábel que permita ligar a UPG coa decisión de afastar a Beiras da súa colaboración coa RG. Para Vilameá trátase dunha información que "non alude a ningunha fonte concreta e que está inzada de prexuízos sectarios". Neste sentido, a UPG "lamenta a falta de rigor profisional na redacción da noticia que, por outra banda, non aparece asinada".

Nota de redacción: O martes 24 de outubro a redactora Rosa Rodríguez intentou, en múltiples ocasións e de 17 a 21 horas, poñerse en contacto con Virxilio Costas a través da súa secretaria de dirección. Sen resposta, optou por recorrer ó gabinete de prensa onde lle recordaron que só era posible establecer comunicación a través da secretaria, coa que lle pasaron de novo por liña interna. Finalmente, recorreu a un "contacto" na RG. Todos os resultados foron infrutuosos.