Xuventudes Socialistas prepárase para as eleccións

As Xuventudes Socialistas de Galicia (XSG) propuxeron onte aproveitar as eleccións municipais de 2007 para fomentar o achegamento das institucións ós mozos, xa que, ó seu xuízo, as xeracións novas aínda "as ven como algo moi alleo a eles".

Trátase dunha das principais apostas da primeira reunión do Foro Institucional Xoven, organizado en Santiago onte para definir as liñas de actuación de cara ós comicios de maio e tras o que a secretaria de Política Institucional das XSG, Silvia Fraga Santos, explicou en roda de prensa que se estableceron cinco "liñas principais" de actuación.

Con elas, a federación xuvenil do PSdeG aspira a "facer partícipes os mozos da política" que se desenvolve na actualidade na comunidade e, por iso, servirán inicialmente como programa para as eleccións municipais e se "concretarán" en liñas de actuación posteriores.

Así, na roda de prensa, Silvia Fraga Santos sinalou que os "ámbitos principais" deste programa son a emancipación dos novos, diferentes liñas de vivenda, traballo e mobilidade; mocidade solidaria, para "dignificar o labor deste colectivo"; hábitos de vida saudables, que fomentará o deporte e a educación para a prevención do consumo de drogas; os "concellos como cidade", onde os mozos se poidan relacionar coa política; e o "fomento da participación" dos mozos no actual sistema político.