O gaseiro 'Mourad Dideouche' entrou na ría de Ferrol, pasadas as catro e media da tarde, coincidindo coa preamar, e diríxese ás instalacións de Reganosa, no municipio coruñés de Mugardos.

Dende unha hora antes, unhas 300 persoas concentráronse esta tarde no muelle de Curuxeiras, no porto de Ferrol, como mostra de apoio ao Comité de Emerxencia Cidadá da Ría de Ferrol e en protesta pola entrada dun novo buque para a planta regasificadora de Reganosa.

Na zona atopaban uns 40 axentes do Corpo Nacional de Policía que impedindo o acceso aos peiraos nos que se atopan as lanchas pesqueiras co fin de evitar un posible bloqueo da entrada da ría por segundo día. Ademais, tres patrulleiras da Guardia Civil atopábanse tamén na zona portuaria.

O Comité de Emerxencia pide a dimisión do presidente da Autoridade Portuaria, Amable Dopico, porque nos escritos que lles facilitaron do porto é a persoa que figura como responsable da autorización que impide o acceso aos peiraos.

MÁIS PROTESTAS

Os opositores á planta de Reganosa realizaron esta tarde cortes puntuais de tráfico en fronte á Autoridade Portuaria de Ferrol e anuncian que van continuar coas súas protestas e que poderían radicalizar as súas accións no caso de que o buque acceda finalmente ás instalacións en Mugardos.

Os mariscadores denuncian que coa posta en funcionamento de Reganosa lles quitarían 90 dos 170 días que poden traballar ao ano, segundo Jaime Gabarri, un dos voceiros da Confraría de Ferrol. Denuncian que os días que accedan buques gaseiros á planta de Mugardos non poderán faenar nos bancos marisqueos próximos. Por iso, sinalou que "estamos en guerra contra todo o que non nos deixa traballar".

Por outra banda, está previsto que sobre as 17.30 horas de hoxe sexa posto a disposición xudicial Bernardo Bastida, patrón maior en funcións da Confraría de Ferrol, detido dende a tarde de onte e acusado de desobediencia á autoridade, ameazas, coaccións e desordenes públicos polo bloqueo da ría de Ferrol. Así, todas as persoas concentradas no muelle se dirixiron en manifestación, a partir das 16.30 horas, aos xulgados do Ferrol.