O rei de España Juan Carlos I abandonou hoxe o plenario do Cume Iberoamericano molesto e en protesta polos ataques ó ex presidente do Goberno José María Aznar, ó seu país e ás supostas accións do seu servizo exterior, dixeron fontes oficiais.

Juan Carlos I regresou posteriormente á cerimonia de clausura.

Os presidentes de Venezuela, Hugo Chávez, e de Nicaragua, Daniel Ortega, protagonizaron os ataques.

O monarca español deixou o plenario mentres Ortega criticaba o comportamento da empresa española Unión Fenosa.

O rei non estivo presente durante a interpretación do himno chileno, que pechaba os debates.

Antes, Hugo Chávez atacara a Aznar, acusándoo de apoiar o golpe de abril de 2002 e cualificándoo de novo de "fascista". 

O presidente do Goberno español, José Luis Rodríguez Zapatero, reprochou a Chávez os seus ataques a Aznar, ó que respondeu o presidente venezolano apelando ó seu dereito a opinar, momento no que Juan Carlos I lle espetou: "¿Por que non calas?".