As TIC son claves para a xestión das empresas

Ineo organizou a presentación do libro nas oficinas da Zona Franca de Vigo nun acto no que participaron Carlos Suárez, esquerda, a secretaria xeral de Modernización da Xunta de Galicia, Mar Pereira FOTO: INEO

Álvaro Gómez e Carlos Suárez acaban de presentar en Vigo a terceira edición do seu libro Sistemas de Información. Ferramentas prácticas para a xestión ante case un centenar de directivos e de representantes de empresas pertencentes a diferentes sectores produtivos galegos.

As anteriores edicións da publicación tiveron "unha extraordinaria acollida no ámbito académico", segundo a editorial Ra-Ma e actualmente se utiliza como libro de referencia "en máis de 50 universidades de España e Latinoamérica en carreiras como Empresariais ou Enxeñerías" sendo o texto "con maior difusión en lingua española" referente a esta materia no ámbito universitario.

No volume analízase como as novas tecnoloxías se converteron "no soporte fundamental para a xestión de calquera organización e para o aumento dos niveis de produtividade e competitividade de calquera empresa", segundo se puxo de relevo no acto. A utilidade da publicación vén principalmente do seu carácter funcional e práctico, e desde a perspectiva da aplicación real das tecnoloxías da información e as comunicacións nas empresas e non desde un punto de vista puramente tecnolóxico.

Ó acto de presentación, organizado por Ineo no edificio de Oficinas do Consorcio da Zona Franca na cidade olívica, asistiu a máxima responsable do goberno autonómico en materia de modernización tecnolóxica, a secretaria xeral de Modernización e Innovación Tecnolóxica da Xunta de Galicia, Mar Pereira.

Ineo preséntase como a asociación TIC de referencia en Galicia, que agrupa 84 empresas do sector das novas tecnoloxías, e segundo afirmou no acto da presentación o presidente da asociación, Jorge Cebreiros, as TIC "convertéronse no máis importante motor de desenvolvemento económico e só as empresas que aposten fortemente pola modernización e a innovación van poder sobrevivir no contexto do mercado actual". Os propios autores do libro, Álvaro Gómez e Carlos Suárez, foron os encargados de describir máis en detalle os contidos e a utilidade dun libro co que "tratan de darlles resposta ás cuestións que se formulan moitos directivos en relación coas aplicacións que se requiren na xestión empresarial" e que foron recollendo ó longo dos últimos anos grazas "ó traballo e ó contacto permanente cunha gran cantidade de empresas" interesadas na cuestión.