Dignificar a quen está ao outro lado do teléfono

As empresas de telemárketing están abrindo os centros de atención ao público en países como Marrocos, Arxentina, Perú ou Colombia aproveitando o coñecemento do idioma e, sobre todo, o sensiblemente menor custo da man de obra. Isto, nun sector dominado por un 70% de temporalidade no que os soldos dos empregados andan polos 600 euros, aínda que moitos non chegan nin ao salario mínimo dado que traballan por quendas.

Na loita contra a deslocalización do sector, os traballadores apuntáronse un tanto ao seren recoñecidos como parte prexudicada polo traslado e as centrais sindicais poden agora alegar contra as decisións da Axencia de Protección de Datos de permitir a marcha dos datos dos consumidores para fóra sen o seu consentimento, por un puro interese empresarial. Tamén, neste momento a CIG, en colaboración coa Xunta de Galicia e coa empresa viguesa Unisono puxo en marcha o primeiro Plan experimental de emprego profesional do telemárketing que trata de evitar as deslocalizacións. Este permitiu, no caso de Unisono, a súa permanencia, e que a súa nómina de empregados (400) vaia medrar nun futuro próximo. A vía de solución neste caso volve ser camiñar cara a unha maior profesionalización.

Mentres, entre 6.000 e 8.000 persoas traballan en Galicia en empresas de call center, uns postos de traballo que como sinala Clodomiro Montero, secretario nacional da Federación de Banca, Aforro e Seguros da CIG (encargado tamén do telemárketing), "está baixo continua ameaza". "Os procesos de deslocalización levados a cabo xa deixaron na rúa 1.000 traballadores de Stream, Teleperformance e Atento e isto non fixo máis que comezar", explica Montero. Empresas como Eurocen (900 empregados), Atento (1.000) ou Bosh (1.000) xa solicitaron autorización á Axencia de Protección de Datos para trasladar a información persoal dos clientes aos novos centros de América Latina. "As empresas de telecomunicacións como Vodafone ou Telefónica xa teñen os seus call centers en Latinoamérica e as subcontratas galegas, para non perder estes clientes pechan aquí para abrir alá", sinala Montero. "Abarátanse gastos de persoal e non se perden os contratos con operadoras que ingresan beneficios ano a ano".