‘Operación Carballo’: recuperar o noso

Alumnos do IES Auga da Laxe FOTO: A.C.

Recuperar a rica biodivesidade galega e contribuír a rexenerar os terreos asolados pola vaga de incendios de agosto. Con este obxectivo ponse en marcha a denominada Operación Carballo, unha iniciativa nada hai dezanove anos que este outono cobra unha dimensión especial. "Se a situación do bosques galegos é difícil, logo dos lumes deste verán volveuse moito máis complicada. A mellor maneira de recuperar o terreo queimado é plantar árbores: reteñen o terreos protexéndoo da erosión e a súa actividade é fundamental para a formación de solos ricos e fértiles", explica Alberto Cifuentes, profesor do IES Auga de Laxe de Gondomar e un dos principais promotores deste proxecto.

Recoller sementes de árbores autóctonas para despois plantalas e coidalas con mimo ata que un novo bidueiro, carballo, castiñeiro ou nogueira agromen entre o noso verde. Isto é á operación Carballo, unha forma de concienciación que busca que a xente se implique na recuperación dunha parte da nosa esencia: a nosa riqueza ecolóxica.

"A iniciativa naceu hai 19 anos como resposta a unha solicitude de sementes dunha organizacion conservacionista asturiana. Daquela mandámoslles uns cantos quilogramos de landras escollidas. Logo, Beatriz García Oñate e máis eu seguimos co proxecto pola nosa conta, implicando os amigos", explica Cifuentes. Aquela acción foi crecendo ata convertirse no que é hoxe: un proxecto no que traballan varios colexios e que conta co apoio de Caixa Galicia e Adega.

Os alumnos do IES Auga da Laxe emprenderon este ano unha nova selección de sementes que logo plantaron en envases, etiquetados co seu nome, data e especie, á espera de poder ser transplantados na primavera. O obxectivo é elaborar un viveiro de 70 carballos, 20 castiñeiros, 20 nogueiras e outros 20 loureiros. Para iso, os alumnos recolleron as sementes precisas e plantáronas en evases tetrabrick, procedentes dos seus fogares e reciclados para usar como maceta. Os envases mantéñense na propia aula, regándoos e coidando que a terra nin seque nin se enchoupe, ou quitando as herbas que medran na superficie. Ó remate do curso, as árbores quedarán a disposición de profesores e estudantes e das axudas de montes de Gondomar para plantar as árbores nos terreos máis axeitados. Os resultados son un éxito, xa que nestes 19 anos, a porcentaxe de obtención de árbores vai dun mínimo de 70% ata un máximo dun 95%.

A pesar diso, Cifuentes recoñece que moitas das especies despareceron, xa sexa polos incendios deste ano ou doutros, como pola apertura de estradas ou a construción de distintas infraestruturas que obrigaron á tala dos mesmos. Non obstante, Cifuentes móstrase orgulloso dos éxitos conseguidos: "Hai árbores que xa miden dous metros e medio e nos que xa puidemos colgar unha hamaca e tomar a sombra". Unha forma de recuperar o noso: dende o verde ata ós costumes.