Xoves 02.09.2010
| Actualizado 18.54
Hemeroteca web
|
RSS
RSS
|
 |
| Jacinto Parga, pola esquerda, Jesús Ares, Xosé Deira e Manuel Morato, onte en Rianxo |
As obras de desdobramento da Vía do Barbanza VG-1.1 motivaran cortes do tráfico tras a Semana Santa para a súa conversión en autovía, segundo anunciou onte a Consellería de Política Territorial, Obras Públicas e Transportes.
O director xeral de Obras Públicas, Manuel Morato, anunciou onte en Rianxo que o primeiro corte programado será entre a ligazón de Dodro e a de Boiro, duns 21 quilómetros, que se iniciará despois de Semana Santa con duración ata finais de xuño.
Volverá abrirse entre xullo e agosto
A vía volverá abrirse ó tráfico en xullo e agosto, no período de maior afluencia turística.
Durante ese corte, o tráfico desviarase a través da AC-305 que, segundo Manuel Morato, será debidamente acondicionado para soportar unha maior circulación de vehículos.
O resto do trazado, entre Boiro e Ribeira poderá ser utilizado con normalidade nos seus 19 quilómetros. Antes de que se produza ese peche entre as ligazóns de Dodro e Boiro, xa a partir desta semana haberá interrupcións puntuais do tráfico obrigadas polas voaduras que se deben realizar para a ampliación da calzada. Os técnicos da Consellería estudan unha solución técnica, a construción dunha ligazón, que permita acortar a lonxitude do itinerario alternativo a través da AC-305 cun paso provisional para os vehículos lixeiros sobre o viaduto que a Vía do Barbanza ten sobre a Ría de Arousa, entre Rianxo e Boiro.
A CPTOPT lamentou as molestias que para a cidadanía vai supoñer este peche e as paralizacións do tráfico polas obras, que vai supoñer unha limitación da mobilidade para os veciños da comarca.
Construiranse oito viadutos
As obras da autovía que ocupará o que hoxe é a Vía do Barbanza, inclúen a construción de oito novos viadutos paralelos ós actuais e obriga á demolición dos situados en Té, O Lampón e O Cespón para construír os novos.
Obras Públicas tamén informou onte de que 3.800 metros da nova autovía corresponden a 7 tramos que discorrerán por un trazado distinto do actual (9,5 por cento da lonxitude total) e en 8.500 metros a nova vía coincide en planta coa vía VG-1.1, pero non en alzado.
A CPTOPT quixo deixar claro onte que xa está a operar para apurar ó máximo os traballos que permitan contar coa autovía moito máis segura, operativa e de maior capacidade que a actual. Esta vía é coñecida polo seu alto nivel de sinistralidade.
