Polo noso territorio

Fusquenlla, unha asociación de Pontedeume, que leva ano e medio actuando contra os desmáns urbanísticos nesta vila, foi a primeira asociación galega en propoñer ­unha manifestación na rúa para levar esta problemática á primeira liña da actualidade. Moitas outras asociacións tanto ecoloxistas como veciñais, sumáronse á proposta. Este colectivo concretouse esta mesma fin de semana: Manifestación en Defensa do Territorio, en Santiago de Compostela o próximo día 6 de maio.

"A práctica totalidade de organizacións ecoloxistas galegas acordamos por unanimidade chamar a cidadanía a unha protesta que sirva para amosar a nosa repulsa pola degradación do territorio, un feito que ameaza á propia identidade de Galiza", indica Fusquenlla nun comunicado. Só dúas das asociacións convocadas o sábado pasado para decidir a data desta asociación ofreceron un si condicionado, xa que deben someter a súa decisión ós órganos de dirección.

"Coincidiuse na necesidade de celebrar este acto reivindicativo e de denuncia dado o estado de deterioración no que se atopa o territorio galego, tanto no litoral como no interior", explica Antón García, representante desta asociación de Pontedeume e para quen, "se o litoral está ameazado pola construción e as piscifactorías, non o está menos o interior, que sofre a espoliación do Courel e da Terra Chá". Deste xeito, Fusquenlla pasa de centrar a súa acción de denuncia de desmáns urbanísticos en Pontedeume a extender a súa acción a toda a comunidade autónoma.

Non obstante, Fusquenlla non esquece "a deterioración dos núcleos históricos, a destrución do patrimonio arquitectónico, a desaparición dos espazos públicos e zonas verdes, e a edificación masiva que achega a especulación e a depredación da paisaxe".

Por todo isto, as asociacións ecoloxistas, que consideran que existe gran sensibilización social neste tema, chaman á manifestación.