Ecoloxistas de tada Galicia únense nunha gran protesta en defensa do territorio

As asociacións ecoloxistas de toda Galicia chaman a cidadanía a participar nunha manifestación contra a degradación do territorio. A cita, o próximo 6 de maio en Santiago de Compostela. Para recordarlle a convocatoria a todos os cidadáns e para explicar os motivos de tal protesta, os máis de 40 colectivos reunidos para este acto presentaron onte un comunicado en forma de manifesto.

"Denunciamos o grave estado de deterioro e de crecente degradación en que se atopa todo o territorio galego, un acelerado proceso de expolio e destrución que lle afecta tanto á costa como ao interior", explica nun comunicado Antón García, de Fusquenlla, a organización que lanzou a idea desta concentración.

Os manifestantes teñen claras as súas reividicacións, que resumen nos seguintes puntos: o cumprimento da lexislación vixente, ­unha nova lei de ordenación do territorio da comunidade, promover unha estratexia de xestión integrada do litoral, a protección efectiva e amplicación da aplicación das figuras de protección ambiental e a transparencia e a participación da cidadanía nas decisións que lle atinxen ao territorio

Antón García e todo o seu colectivo, con raíces en Pontedeume, deixan aínda máis claro o obxectivo final "a implantación dunha nova cultura do territorio"

Fusquenlla e as máis de 40 asociacións que convocan a manifestación do vindeiro domingo na capital de Galicia, consideraron importante facer público un manifesto no que denuncian a realidade actual do territorio galego e claman por solucións.

Aviso ós concellos de despois das eleccións

"Pensamos que a actual Xunta de Galicia e que os concellos que saian das vindeiros comicios deberán coordinar os seus esforzos. E non só iso: a lexislación haberá de modificarse e os poderes centrais de Galicia están chamados a elaborar un plan director de ordenación do territorio, naturalmente discutido e acordado polas organizacións sociais e núcleos de opinión. Esta participación das multitudes na elaboración de tal plan director constituirá a garantía de que sexa plenamente democrático. Ora ben, sen planificación central e democrática da ordenación territorial o caos se perpetuaría".

Os ecoloxistas consideran que "soou a hora de que digamos: abonda". "A mobilización do 6 de maio ten que significar unha gran xornada de esperanza e unha chamada á Xunta e as administracións locais para que exerzan realmente o poder de que dispoñen para frear esta vaga de degradación e dilapidación do noso patrimonio sen se deixar intimidar polas forzas poderosas do diñeiro e da cobiza", remata o manifesto.