Boicot a Reganosa

O gaseiro ‘Galicia Spirit’ tenta entrar na ría de Ferrol rodeado de lanchas de seguridade e os mariñeiros FOTO: KIKO DELGADO

Galicia quere converterse en potencia enerxética, ó introducirse no mercado do gas coa planta de Reganosa en Mugardos. Non obstante, boa parte da cidadanía da comarca oponse á posta en marcha desta infraestrutura por razóns de seguridade. Así o demostrou onte, impedindo contundentemente a entrada do primeiro gasero. O Galicia Spirit, paradoxalmente construído nos estaleiros de Corea, intentou acceder sen éxito á estreita ría de Ferrol desde primeira hora da mañá. En fronte atopouse cunha barricada de lanchas de mariscadores, mobilizadas en nome do Comité Cidadán de Emerxencia. Ó primeiro intento, o buque non puido entrar. E ó final do día, pese ó apoio público de Goberno central e Xunta, tampouco alcanzou o seu destino.

Polo medio transcorreron doce horas de tensión e incógnitas. Ás 07.40 horas o metaneiro intentaba acceder a augas ferrolás con máis de 140.000 metros cúbicos de gas natural licuado, rodeado de remolcadores e embarcacións da Garda Civil do Mar. Na zona de entrecastelos, comprendida entre as fortalezas da Palma e San Felipe, deuse case de bruzos con máis de 30 motoras de mariscadores. Coordinada polo Comité Cidadán, a protesta servía para "demostrar os perigos para o ecosistema e a seguridade humana derivados da posta en marcha da planta". Segundo testemuñas presenciais, "o buque chegou a enfilar a entrada da ría" aínda que non excedeu a altura do dique do porto exterior.

O acceso resulta imposible coa marea baixa

Tras media hora de escaramuzas, ás 08.10 horas, os obstáculos humanos e metereolóxicos se aliaron en contra do Galicia Spirit. Coa baixada da marea, a entrada á ría resultaba imposible. O buque, fletado por Unión Fenosa e cun custo de 200 millóns de euros, pegaba un xiro de noventa graos e enfilaba cara á ría de Ares. Ás 09.00 horas xa fondeaba tranquilamente na zona aresá de Punta Coitelada. Tivo que esperar dez horas máis para reintentar un novo desembarco en augas ferrolás. Finalmente, terminou o día regresando a Ares ó atoparse cunha barreira de lanchas e seguindo as recomendacións dos prácticos.

Pola súa banda, o Comité Cidadán denunciou onte en roda de prensa que Reganosa non ten autorización de funcionamento, só de construción, o que lle impediría realizar probas como a prevista; que non cumpre coa distancia esixida á poboación (con núcleos como o de Mehá a 300 metros ou Mugardos a 800 metros); e que tampouco ten plans de emerxencia.

Funcionamento da planta tras tres meses de proba

"Non é suficiente dicir que unha instalación é segura, hai uns protocolos de seguridade que teñen que demostrarse tres meses antes de finalizar unha obra como esta", subliñou Carmelo Teixeiro, voceiro do Comité. Tras os tres meses de proba sería cando, segundo Teixeiro, Reganosa podería solicitar unha autorización de funcionamento.

Por iso, Teixeiro critica a actitude do Capitán Marítimo Jorge Cao, do presidente da Autoridade Portuaria de Ferrol-San Cibrao, Amable Dopico, e do delegado do Goberno en Galicia, Manuel Ameijeiras, por estar "inactivos ante a entrada dun barco que quere ameazar a ría de Ferrol". Dende o Comité, recalcouse que non están a "romper á legalidade, senón defendéndoa", polo que instou ás autoridades para prohibir a entrada do buque.

A regasificadora de Mugardos contou neste infructuoso periplo co apoio do Goberno central e da Xunta. Deste xeito, o presidente autonómico, Emilio Pérez Touriño, apuntou que "é necesario cumprir a legalidade vixente e garantir a operatividade e funcionamento da planta". Touriño xustificou que a regasificadora de Ferrol "é un proxecto do anterior Executivo, pero debe transformarse nun espazo de oportunidade no desenvolvemento comarcal, o Estado debe garantir a actividade de Reganosa". Pola súa banda, o conselleiro de Industria, Fernando Blanco, garantiulles ós cidadáns que o barco cumpre con todos os permisos requiridos, mentres que o subdelegado de Goberno, José Manuel Pose, recalcou que "a nosa obrigación é que o gaseiro entre na planta de Mugardos".