Galicia produce cada ano medio millón de toneladas de residuos orgánicos. Un tipo de lixo que pode ser reciclado mediante procesos naturais e que, non obstante, acaba formando parte dun vertedoiro ou convertido en borralla tras pasar pola incineradora de Sogama. Para evitar estas prácticas nocivas para o medio e aforrar os custos que supoñen a recollida e a xestión dos residuos orgánicos, Adega e Amigos da Terra levan anos apostando pola compostaxe caseira, é dicir, por que cada persoa trate o seu propio lixo no fogar.

Os beneficios deste sistema son, para as asociacións ecoloxistas, vitais, xa que reducen en orixe o volume de residuos, decántase por un proceso biolóxico para descompoñer o lixo en lugar dunha incineración nociva e proporciona humus, moi beneficioso para o crecemento das plantas e a saúde do noso solo. Ata o momento, unhas 856 familias xa levan a cabo a compostaxe caseira grazas ó programa de educación ambiental promovido por Adega en colaboración cos concellos, cifra que se complementa coas 180 de Amigos da Terra. O éxito destes programas levou a Consellería de Medio Ambiente e Sogama a iniciar un proxecto piloto de compostaxe doméstica en concellos de Ourense, Pontevedra e A Coruña e que agora se estenderá a unha ducia de novos municipios.

A clave: correcta separación dos materiais en orixe

Explicar en que consiste, instalar o composteiro nos fogares interesados e realizar visitas de seguimento son as tres fases que comprenden o desenvolvemento dos programas ambientais desenvolvidos por Adega, tal e como explica o responsable desta área, Ramsés Pérez, quen sinala coma fundamental para o éxito da compostaxe a "boa separación dos residuos orgánicos no fogar e unha correcta relación entre os restos de cociña e os de horta e xardín" para evitar problemas derivados da acumulación do lixo como a aparición de cheiros ou de animais como moscas ou ratos.

"Contribúes a coidar o medio e ademais aforras na factura"

Todo son vantaxes. Así de claro se amosa o compostelán Joaquín Saavedra, veciño da rúa Virxe da Cerca que dende o mes de abril pasado participa no programa de compostaxe caseira de Adega. A pesar de que recoñece que nalgunhas ocasións sería máis cómodo ir ata o colector a tirar o lixo, Joaquín cre que a compostaxe caseira é unha forma de ser "un pouco máis civilizados".

Deste xeito, tratando os residuos orgánicos na casa, "axudas a coidar o medio ó tempo que obtés un abono de moi alta calidade para a horta". A pesar do traballo que dá ter o composteiro, Joaquín amósase sorprendido da rapidez coa que se produce a descomposición da materia. "Eu xa vivira este proceso nas cortes, pero non pensei que con este sistema caseiro se conseguira o mesmo efecto", asegura este compostelán.

Mentres María Rodríguez, membro da área ambiental de Adega explica o funcionamento do composteiro que Joaquín instalou no seu xardín, este compostelán explica outra das bondades deste sistema: a redución da factura do lixo. Un capítulo no que Joaquín ten unha queixa, non contra o programa de Adega, senón do concello, que, tras case un ano compostando o lixo orgánico, aínda lle segue pasando a factura completa. Trámite administrativo que, non obstante, non empaña os beneficios da compostaxe.