O paraíso do río Mao está ameazado por unha canteira

Fermosa vista do val do río Mao cuberto pola néboa, xunto onde está previsto que se localice a canteira FOTO: ASOCIACIÓN A PRADA

Galicia pode pasar pronto de ser o país dos mil ríos ó das mil canteiras. Polo menos, iso é o que denuncian os veciños do concello da Veiga, en Valdeorras, que se unen ó berro dos dos Courel contra as louseiras porque a paraxe de Río Mao está ameazada polo proxecto empresarial dunha explotación de cuarcita da empresa Gesconsa 2000.

Segundo indica a Asociación Cultural de Prada, hai xa dous anos coñécese o plan que lle vai afectar a unha contorna que nun futuro pode formar parte do Parque Natural de Pena Trevinca, pero pregúntanse porque o Goberno e o Concello lle deron o visto e prace.

O movemento dos veciños non se fixo agardar e internet eríxese como o mellor vehículo para facer chegar a súa guerra baixo o lema Non á canteira. Nesta web, censuran a postura do propio alcalde da vila, o socialista Fernando Fernández, que definiu de "barbaridade" estes proxectos pero que, paradoxicamente, xustifica o permiso municipal dicindo que "cumpre con todos os requirimentos legais".

A Serra do Eixe, o Pico de Fiais, o desfiladeiro que forma o río Mao e o santuario do Cristo da Ascensión son as referencias deste municipio ourensán que corren o risco de verse ameazadas perigosamente pola canteira, polo que a Asociación Cultural de Prada decidiu tomar cartas no asunto. Confesan que a "canteira ficaría nun mal soño, pero todos os que amamos este lugar somos conscientes de que se pode converter nunha realidade con autorización oficial para levar a cabo a mutilación de toda unha montaña".

Os veciños insisten que "nas mans das autoridades, e en especial da corporación municipal do Concello da Veiga, co seu alcalde á fronte, debe estar a mobilización e o rexeitamento unánime que evite, por moito cumprimento dos requisitos legais que teña a empresa Gesconsa 2000, que os montes próximos ó río Mao e a Prada se convirtan en queixo gruyere", por variadas razóns que non deben ficar só no efecto visual que creará a canteira e a perda do patrimonio natural único que goza esta zona de Galicia, senón tamén "polas fatídicas consecuencias que levarán ó desgastamento e o perigo de circular pola estrada do Barco a Prada, o illamento poboacional e a perda do turismo rural", un negocio que se atopa en fase emerxente nas terras de Valdeorras.

Segundo a vila, o rexedor debe estar á altura das circunstancias e demostrar que é "progresista".