Lei de Caixas "limpa"

O vicerreitor Iván Anea, esquerda, Fernando Blanco (BNG), Abel Losada (PSdeG), Luis Espada e Pedro Puy (PP) FOTO: SALVADOR SAS/EFE

O Executivo galego está "dis­posto a redactar e a escribir" unha Lei de caixas máis depurada tras dous días de intensas reunións e despois de que "un alto cargo do Goberno" ó que Feijóo non quixo pór nome lle comu­nicase ó presidente da Xunta a dispoñibilidade de chegar a un acordo para retirar o recurso de inconstitucionalidade que pe­sa sobre a norma. O re­sultado desa disposición chega­ba onte a Madrid cunha nova redacción que pretende axustala ós requisitos que esixe o Goberno para desbloquear os apartados que desde onte, tras a admisión a trámite do recurso por parte do Tribunal Constitu­cional xa entrou a formar do limbo xurídico.

Co tempo xogando en contra, xa que a paralización pon en xogo os prazos para a renovación dos órganos de di­rección e as posibilidades para acceder ás axudas do FROB que vence a finais de xuño, os servizos xurídicos da Xunta reelaboraron o texto aprobado cos votos dos populares e nacionalistas sen que estes últimos, os socios circunstanciais do partido do Goberno, teñan noticias sobre os cambios.

Haberá contactos ata o vindeiro martes

Sobre ese documento conti­nuará o intercambio de infor­mación que se intensificará a­ta o vindeiro martes, a data da reunión na que as dúas par­tes aspiran a pechar un acordo. As primeiras reunións entre Xunta e Goberno permitiron aproximar posicións en varios dos apartados en conflito. As maiores diferenzas agrú­panse ao redor da discrecionali­dade da Consellería de Facen­da para autorizar un SIP, que xa se modificou. A capacidade do Goberno autonómico para autorizar unha fusión é outro dos apartados que haberá que axustar así como as esixencias sobre a proporcionalidade necesaria pa­ra dar o visto e prace a este tipo de proxectos. Madrid insiste en que a maioría simple da lei galega escapa ás esixen­cias da lexislación básica que pide que sexan dous terzos.

"Coa man tendida" que Feijóo mantén nun confli­to iniciado a cara de can entre populares e socialistas, o presi­dente volvía onte expresar a vontade de alcanzar un acor­do "coas mesmas regras de xo­go que rexen para outras autono­miñas". De novo, o presidente volveu responsabilizar os xo­cialistas galegos de bloquear un acordo para impulsar a fusión das caixas galegas e anular un "pacto polo sistema financeiro" con efectos anticrise.

Fica bloqueada a renovación das cúpulas

Onte precisamente, coñeceuse a decisión do Tribunal Constitucional, que decidiu admitir a trámite o recurso interposto polo Goberno o pasado día 9 contra varios apartados da Lei de caixas. A aceptación supón a suspensión, con efec­tos da data na que se pre­sentou, dos apartados en con­flito e, polo tanto, deixa os representantes nomeados tan­to polo Parlamento como por varias corporacións locais sen posibilidade de tomar posesión. Aparcada queda tamén a re­novación dos órganos de di­rección para a que a lei esta­blecía un prazo de dous meses a partir da súa entrada en vigor desde principios de xaneiro.

Con todo, aínda que a sus­pensión rexe a partir da data da presentación do recurso, para os terceiros, neste caso as caixas, a data de referencia se­rá a publicación no BOE. Esta circunstancia permítelle a Caixa Galicia continuar o proceso ini­ciado de renovación ó contra­rio que Caixanova, que preferiu adiantarse e paralizar antes a renovación dos conselleiros. O Tribunal terá que pronunciar­se sobre a renovación do 75% dos órganos de decisión; a ca­pacidade da Xunta para autori­zar a integración dunha caixa nun sistema institucional de pro­tección (SIP) ou o sistema de ma­iorías polo que se aproba unha fusión. Para resolver conta cun prazo de cinco meses, prorro­gables a outros cinco, pero con só esgotar o primeiro, a decisión coñeceríase en xullo, cando xa se superou a data tope do 30 de xuño que marcou a Co­misión Europea para recorrer ás axudas do FROB.

O BNG, o grande esquecido no diálogo entre a Xunta e Madrid, reclamoulle onte de novo ó pre­sidente Zapatero, que "actúe con moita máis prudencia" respecto ó futuro das caixas galegas. Así o indicou o o seu voceiro parlamentario, Car­los Aymerich, quen lle reprochou a Zapatero a postura expre­sada no Congreso, xa que considerou que expresou dúbidas sobre a solvencia.