"Feijóo, ás veces, máis que facer de verdade, parece que fai. Neste caso, como de malo vai quedar o PSOE, a el sáelle gratis. Pero o BNG non vai quedar quedo. Imos esprimer todas as posiblidades que teña este país de poñerse en pé. Estamos xogando o dispor de ferramentas de financiamento propias e non telas é unha auténtica animalada para Galiza. Xa quedamos sen sector enerxético, estamos quedando sen sector primario, podemos quedar tamén sen sector financeiro? E o seguinte que será?". Así reaccionaba onte a dirección do BNG ante as informacións publicadas por este periódico que apuntan a que o Executivo galego xa lle enviou ó estatal unha versión pulida da Lei de caixas que fora aprobada polo Parlamento autonómico -cos votos de PP e BNG-, co fin de que este reitre o recurso de inconstitucionalidade. Fontes oficiais do Bloque confirmáronlle onte a GH que eles non coñecen o texto remitido polo presidente da Xunta a Madrid nin foron consultados.

Desde o BNG aseguran que o Goberno de España "ten decidido que non vai haber fusión galega" entre as caixas. "Hai unha decisión política e do que se trata é de conseguir que o Estado mude isto, rectifique e retire o veto á fusión. Nós estamos convencidos de que máis que un recurso contra a lei é un recurso contra a fusión de Caixa Galicia e Caixanova", denuncian. Neste sentido, o BNG advírtelle a Feijóo que "non se trata de mellorar ou cambiar os parágrafos da lei, senón de que a única maneira de variar a posición do estado é forzando ou creando unhas condicións políticas que o obriguen a reconsiderar a súa posición". O Bloque chama a Feijóo a actuar de verdade e a "usar todas as armas que ten ó seu dispor". Iso pasaría, segundo a fronte, por presentar un recurso de inconstitucionalidade ó FROB, "un instrumento que viola competencias exclusivas das comunidades autónomas". "E tamén haberá que facer unha gran mobilización social para que ó Goberno do estado non lle saia gratis o veto á fusión, porque o que pretende é espoliar aforro galego, que os 80.000 millóns de euros en activos que reúnen as dúas caixas galegas se drenen cara a fóra e vaian financiar outros territorios do estado". Neste sentido, o BNG comeza a sospeitar de que Feijóo lle podería estar poñendo "gratis" ó estado "unha cuestión tan grave como esta". Igualmente, advírtenlle ó xefe do executivo autonómico que el non pode modificar a Lei de caixas aprobada polo parlamento a iniciativa do BNG. Así, advirte que, de darse o caso, "nós non aceptaremos ningún cambio na lei, votaremos en contra de calquera cambio no parlamento galego que supoña impedir a fusión galega".

Mentres Feijóo non desvela os detalles da negociación que está mantendo en Madrid, e na que cabe a posiblidade de que o líder popular acceda ás pretensións do Goberno central, a polémica no BNG a escala interna está servida. Mentres a UPG defende a capa e espada que a única vía é a fusión entre as dúas caixas galegas, outros sectores da fronte nunca o tiveron tan claro. O líder do Encontro Irmandiño, Xosé Manuel Beiras, xa advertiu no seu día de que isto non tiña fundamentación, nunha posición similar á do ex portavoz nacional Anxo Quintana, que publicou un informe a favor de fusións interterritoriais.

O líder popular divorciou a PSdeG e nacionalismo

No Consello Nacional do Bloque, Beiras xa deixara claro que o que estaba facendo o BNG, indo da man do PP no tema das caixas, era ser "o parvo útil" porque "Feijóo xoga a outra cousa distinta da que aparenta". Beiras asegura que "hai unha comunicación constante a nivel de Estado entre o PSOE e o PP e hai coincidencias entre eles" en facer a concentración das entidades a escala de Estado; en borrar do mapa a distinción constitucional entre as autonomías de primeiro rango e as demais; e en vehiculizar a estratexia de bancarizar as caixas.

Segundo Beiras, entre PP e PSOE, realmente, malia que o PPdeG apoiase a proposición de lei do BNG, "hai unha estratexia de acordos gravísimos para os intereses de Galiza". Para o histórico nacionalista, está clara a estratexia do líder popular galego. "Feijóo dille ó BNG que está disposto a defender as caixas galegas, entra na cuestión da reforma da lei proposta polo Bloque e provoca o divorcio do PSdeG co BNG". Para Beiras, nas cuestións de interese fundamental para o país, PSdeG e BNG deberían "actuar coordinadamente" e iso rompeuno Feijóo aproveitando esta cuestión na que picou a dirección nacionalista. Beiras cre que a actuación do Bloque foi "temeraria" e "imprudente" e que agora Feijóo podería reformar o texto unilatelarmente, algo que "é indecente e impresentable, pero xa sabemos que o PP de Feijóo é indecente e impresentable". Beiras confía, non obstante, en que o BNG poida saír desta situación "difícil", á vez que lamenta que non se escoitaran internamente as voces que pedían cautela. "Estamos na oposición, non no goberno" e o que hai que defender, para Beiras, é un recurso contra o FROB e que, pase o que pase, as caixas teñan o centro de decisión en Galicia.