A Feijóo esgótaselle o tempo. Este luns que vén deberá decidir se adianta as eleccións. No seu círculo de confianza aseguran que o presidente da Xunta non se entrevistou este venres pasado con Mariano Rajoy, aproveitando a súa viaxe a Madrid para falar co ministro Arias Cañete da agonía do noso agro e do noso mar, pero tamén comezan a filtrar leves sinais de que aumentan as probabilidades de que Galicia vaia ás urnas o 21 de outubrom, coincidindo cos comicios en Euskadi.

O certo é que a decisión do lehendakari Patxi López reduciu a marxe de manobra do inquilino de Monte Pío, que até o comezo do verán parecía máis partidario de esgotar a lexislatura. Os receos antiautonómicos que se respiran en Bruxelas e tamén na capital de España e o custo de imaxe que lle suporía alongar o período de campaña electoral, que comezará este setembro no País Vasco e que remataría, hipotéticamente, en Galicia no vindeiro marzo, parece que van inclinar definitivamente a decisión de Feijóo cara ao adianto, co cal, de paso, compracería ao presidente do Goberno español e ao núcleo duro do PP.

Ademais, as urnas de outubro facilitaríanlle ao líder do PPdeG aparcar a controvertida reforma da Lei Electoral, que agocha un contestadísimo recorte unilateral de deputados no Hórreo, e a incómoda comisión de investigación das caixas. Como guinda, deixaría á oposición case sen tempo para se recuperar das crises de liderado (no PSdeG seguen a voltas con Pachi Vázquez, José Blanco, e Fran Caamaño) e de modelo (o nacionalismo está a dixerir a brutal escisión no BNG).