Menos relixión e máis creación, piden os docentes

Os docentes de Tecnoloxía, Música e Debuxo saíron onte ás rúas de Santiago en defensa das súas materias FOTO: CRIS TOBÍO

Baixo o lema ‘Non hai ensino de calidade sen Tecnoloxía, Música e Plástica’, máis dun milleiro de profesores que imparten estas materias saíron onte á rúa en Santiago para reclamar "unha maior carga horaria obrigatoria" no currículo de Educación Secundaria Obrigatoria (ESO). Consideran "insuficiente" e "descompensada" a última proposta de carga horaria da Consellería de Educación, que suma unha hora a cada materia fronte á oferta anterior, que reducía a carga lectiva nun 40%.

O secretario nacional de CIG-Ensino, Anxo Louzao, cifrou nun 80% a participación na manifestación, que responde á "posición da Consellería de Educación" porque a proposta, ao seu ver, se sitúa "lonxe" do que demandan os docentes e o sindicato nacionalista.

CIG-Ensino, convocante do movemento de protesta, reclama que se amplíe a carga lectiva obrigatoria de Tecnoloxía a seis horas, a catro a de Música para cursar en 1º e 2º de ESO e ofertala como optativa en 3º, mentres que para Plástica pide cinco horas obrigatorias en toda a ESO.

Louzao acusa a Consellería de Educación, de dedicarlle máis horas lectivas ó ensino da relixión que á formación en actividades artísticas.

Baixo o lema ‘Non hai ensino de calidade sen Tecnoloxía, Música e Plástica’, os docentes partiron uns minutos antes das 12.00 horas dende a Praza de Cervantes para rematar uns 20 minutos despois a mobilización ante a sede da Consellería de Educación en San Caetano, onde se cruzaron coa manifestación dos médicos interinos, cos que intercambiaron saúdos.

Os manifestantes, que pertencen a un colectivo duns 1.700 docentes que imparten esta materia en máis de 300 centros en Galicia, segundo datos achegados pola CIG-Ensino, acompañaron a manifestación con música de instrumentos de percusión como pandeiretas e tambores. Portaron tamén outras pancartas nas que se podían ler consignas como ‘A tecnoloxía é cultura’ e ‘Por unha educación creativa’, "Piñón negociación" ou "máis cultura e menos doutrina".

En canto á participación, mentres a CIG a elevou ó 80%, a Consellería de Educación situou no 26,73% o seguimento de media en Galicia da xornada de folga, ao contar a convocatoria co apoio de 374 dos 1.399 profesores convocados. Por provincias, destaca o seguimento en Lugo, co 39,92%; seguida da Coruña, co 33,84%; Ourense, co 24,89%; e Pontevedra, co 13,37%.

"Esperamos que tras o éxito da manifestación e da folga a consellería reflexione, recapacite e faga unha proposta que se achegue á nosa e vaia en beneficio do alumnado e do profesorado", aseverou Louzao.

Por iso, na reunión prevista para hoxe do consello Escolar de Galicia, a CIG-Ensino manterá a posición actual "amparada por 1.700 profesores e unhas 4.000 sinaturas". Ata a data, segundo puntualizou Louzao, entregaron unhas 2.700 rúbricas ás que sumarán as 1.500 que presentarán hoxe no rexistro da consellería.