Literatura galega do século XX volve ó currículo de Bacharelato

A Consellería de Educación publicou onte no Diario Oficial de Galicia (DOG) a nova orde pola que restablece Literatura Galega do Século XXI como materia optativa no Bacharelato, polo que o sindicato CIG-Ensino anuncia que retirará o recurso contencioso-administrativo que tiña presentado respecto diso.

A central valora como "positivo" esta rectificación do departamento que dirixe Laura Sánchez Piñón, aínda que considera que sería "máis plausíbel" se se contemplase tamén con Literatura Universal Contemporánea e Xeoloxía "e se se fixera antes de iniciar o actual curso escolar".

"Con esta orde faise xustiza e dáselle rango de normalidade á nosa literatura no sistema educativo, cuestión que estaba posta en xuízo coa imposibilidade de estudar a materia como optativa non Bacharelato", sostén CIG-Ensino nun comunicado.

O sindicato nacionalista recorda que Educación publicou o 27 de xuño pasado "sen previa negociación" unha orde que establecía a relación e o currículo de materias optativas de Bacharel a ofertar polos centros. Nela, a Consellería suprimía a Literatura Galega do Século XXI, Literaturas Hispánicas, Literatura Universal e Contemporánea e Xeoloxía, "materias que ata ese momento se viñan ofertando".

Desde entón, CIG-Ensino, "diante dese atropelo á nosa cultura e á falta de negociación", emprendeu unha serie de accións encamiñadas a que Educación rectificase, como a entrega de máis de mil firmas, solicitar o apoio dos directores de Lingua Galega das universidades de Santiago e A Coruña ou a presentación do recurso ante o Tribunal Superior de Xustiza de Galicia (TSXG), polo que onte celebrou que a Consellería atendese a súa demanda.

Recurso contra os concertos a centros non mixtos

Por outra parte, o sindicato CIG-Ensino presentou un recurso contencioso administrativo ante o Tribunal Superior de Xustiza de Galicia (TSXG) en contra da orde da Consellería de Educación na que se subscriben e se modifican concertos educativos con varios centros privados que, segundo denunciou, "segregan o alumnado" por razón de sexo e "impiden" a escolarización mixta.

CIG-Ensino tachou de "preocupante" que o departamento que dirixe Laura Sánchez Piñón "ceda á presión" de centros vinculados a "posicións retrógradas" e "con idearios ultraconservadores e reaccionarios", entre os que citou a Las Acacias, Montecastelo e Aloya, en Vigo; ou a Montespiño e Peñarredonda, na Coruña.