A Fundación Encuentro di que se invista en contidos e non en pecés

A investigación educativa, a creación de contidos tecnolóxicos específicos e o compromiso de profesores e pais son fundamentais para que o investimento en novas tecnoloxías e a utilización de computadores e internet en clase sexa rendible. Esta é unha das conclusións do Informe España 2009. Unha interpretación da súa realidade social da Fundación Encuentro, feito público onte. O informe asegura que "é máis rendible investir en investigación educativa que en dotar de computadores un colexio". Para a Fundación Encuentro, "sorprende que se gasten enormes cantidades de diñeiro público en tecnoloxía e se fagan esforzos verdadeiramente pírricos en investigar o impacto desa tecnoloxía nos procesos de ensino-aprendizaxe". Sobre o rendemento dos alumnos, conclúe que "os alumnos que suspendían sen usar internet, seguen suspendendo con internet, e os que rendían ben sen internet, seguen facéndoo con internet".