Anxo Quintana: “Ao mellor os galegos temos que pensar en deixar de pagar peaxe na AP-9”

A conselleira de Política Territorial e os grupos do PP e do BNG pediranlle ao ministerio de Fomento que lle esixa a Autoestradas do Atlántico S.A. (Audasa), un plan que evite que se volvan repetir situacións coma a do martes, cando dous accidentes producidos polo xeo sumiron a AP-9 no caos. Así mesmo, o vicepresidente Anxo Quintana, considerou "lóxico" que os usuarios da vía "pensen en deixar de pagar" a peaxe se Audasa "non cumpre os compromisos" contractuais relacionados co cobro das taxas por circular por esta infraestrutura.

Ante as acusacións de falta de previsión e información, a concesionaria defendeu a súa actuación argumentando que a pesar de ser informada de "alerta verde" no referente á situación meteorolóxica estendeu sal na AP-9 de forma preventiva ás 22.00 horas do 1 de de­cembro e ás 05.00 horas do 2 de decembro, dúas horas antes do primeiro accidente múltiple rexistrado na autoestrada, ao que seguiu outro 75 minutos despois.

Fontes de Audasa, encargada da conservación e explotación da autoestrada, explicaron que se cortou ao tráfico a AP-9 unha vez ocorridas as dúas colisións múltiples, nas que resultaron implicados uns 40 vehículos a primeira hora da mañá, debido a unha "repentina sarabiada", e asegurou que anunciou esta incidencia en "todos" os paneis informativos. Debido a este problema non cobraron a peaxe e seguiuse o Plan de Vialidade Invernal, subliñaron as mesmas fontes.

Pero as explicacións da concesionaria non calman as críticas vertidas polos grupos políticos. A conselleira de Política Territorial, María José Caride, indicou que Audasa, como concesionaria da AP-9, debe pór os medios necesarios para que non se repitan situacións caóticas como a producida o martes.

"Unha infraestrutura vital que vertebra a nosa mobilidade"

Así, Caride considerou a AP-9 "unha infraestrutura vital para nós porque vertebra a maior parte da mobilidade de todos os cidadáns de Galicia", segundo informou onte o departamento nun comunicado.

A conselleira informou de que Política Territorial xa lle transmitiu unha queixa formal ó Ministerio de Fomento para que, como Administración titular da AP-9, lle esixa a Audasa que garanta as perfectas condicións de mobilidade na autoestrada. "Todos entendemos que poidan existir incidencias, pero hai que establecer os mecanismos para prevelas e actuar de forma inmediata cando aparece un problema", aseverou onte a conselleira.

Ante as críticas de numerosos usuarios, reiterou que a concesionaria, se o precisa, "deberá poñer máis estacións meteorolóxicas, máis cámaras e máis paneis informativos", co fin de que os galegos poidan circular con normalidade por unha vía "absolutamente imprescindible para a mobilidade e para a actividade económica de Galicia".

Doutra banda, Anxo Quintana remarcou que o traballo de Audasa consiste en "cobrar unha peaxe para dar un servizo, e se se dá, se cadra os cidadáns galegos teñen que pensar en deixar de pagar a peaxe", salientou o vicepresidente. Quintana explicou que "Audasa é a concesionaria da xestión dunha infraestrutura básica para o país, que os galegos pagan xenerosamente coas taxas", polo que tachou de "inadmisible" a situación de colapso do martes. Deste xeito, o número dous do Goberno autonómico referiuse á queixa formal que Política Territorial anunciou onte e entendeu que, ante circunstancias como a mencionada, "e posto que non se reduce á peaxe", estase en "condicións de reclamar que non se reduza o servizo, senón que se mellore".

"Independentemente" do que vaia facer o Goberno galego, Quintana defendeu que os cidadáns "están no seu pleno dereito para facer as reclamacións oportunas polos danos ocasionados" e insistiu en que "Audasa debería pensar moitísimo en mellorar os servizos".

De non facelo, "sería lóxico que os usuarios galegos se cuestionasen a xustiza de pagar unha peaxe polo que despois non reciben o servizo pactado", concluíu.

Pola súa parte, o Partido Popular pediulle á ministra de Fomento, Magdalena Álvarez, que aclare, en sede parlamentaria, se vai tomar medidas para que non volva repetirse o problema. Os deputados galegos Ana Pastor, Nava Castro e Javier Guerra presentaron unha pregunta no Congreso a este respecto.

Con esta iniciativa, os deputados do PP pretenden que o Goberno lles "garanta ós galegos o normal funcionamento das súas infraestruturas sobre todo nunha comunidade na que as inclemencias climatolóxicas son algo constante". Recordan así mesmo que os galegos tiveron que soportar o martes máis de dez quilómetros de retencións e que o colapso da AP-9 derivou na saturación da N-550, na que moitos condutores tardaron máis de tres horas en percorrer os 28 quilómetros que unen A Coruña e Ordes.

Ademais, a senadora popular pola Coruña, María Jesús Sainz, pediu explicacións por parte do Executivo central, ó entender que a concesionaria "non deu a resposta adecuada" nin "aplicou as medidas de prevención pertinentes".

Pola súa parte, o portavoz do BNG no Congreso, Francisco Jorquera, rexistrou outra iniciativa parlamentaria para pedirlle a Fomento que demande a Audasa un plan de medidas preventivo "adecuado, eficaz e suficiente", indicou. "A pesar de ser coñecidas as previsións meteorolóxicas, que anunciaban temporais de neve e xeo, non se evitou o enorme caos na autoestrada", dixo, e engadiu que está "en cuestión o plan de actuación que Audasa afirma levar a cabo e que ante a magnitude do sucedido demostrouse totalmente ineficaz e insuficiente".