A taxa de criminalidade galega, 40 puntos por baixo da media europea

Antón Louro, no centro, con Luis Manuel García Mañá, Manuel Ferreiro, Delfín Fernández, José Manuel Pose, Camilo Ocampo e José Vázquez Portomeñe FOTO: Cabalar/EFE

Galicia afiánzase como unha das zonas máis seguras de Europa e, xa que logo, do mundo. Segundo os datos que facilitou onte o delegado do Goberno, Antón Louro, sobre o balance anual, a taxa de criminalidade en Galicia situouse durante o ano pasado en 27,1 delitos por cada mil habitantes, fronte ós 45,8 alcanzados de media en España ou os 69,1 delitos por cada mil habitantes na Unión Europea.

E todo iso nesta época de crise que apenas repercutiu sobre os datos, xa que sobre 2008 o índice de criminalidade só creceu un 0,7. Galicia mantense así 18 puntos por baixo da taxa española e a case 40 da europea. Louro explicou que ese incremento sería aínda menor se se extraesen os datos correspondentes ós delitos contra a seguridade viaria (agora tipificados como penais coas modificacións lexislativas realizadas recentemente).

O delegado do Goberno puntualizou que sen contabilizar esas infraccións de seguridade viaria a taxa de delitos e faltas durante o ano pasado caería ó 25,6, o que na práctica supón o mantemento das cifras do ano 2008, xa que se experimentou un aumento de 0,2 puntos por 1.000 habitantes.

Antón Louro, que durante a presentación estivo acompañado do xeneral da Garda Civil en Galicia, Manuel Ferreiro; o xefe superior de Policía, Luis García Mañá, e os subdelegados das catro provincias, recalcou que ata con eses datos de tráfico, a taxa alcanzada en 2009 continúa sendo inferior á media da última década, que está en 26,5 delitos por cada mil habitantes. E aínda así, en termos absolutos, o aumento debeuse non ó incremento dos delitos, senón das faltas, fundamentalmente as relacionadas con lesións, pelexas e agresións de carácter menor.

Durante 2009 contabilizáronse un total de 27.771 delitos (17 máis que en 2008) e 21.399 faltas (722 máis que o ano anterior), á parte dos 4.203 delitos contra a seguridade viaria e outras 22.398 infraccións non principais.

En canto a delitos, baixaron os referidos ó patrimonio, cun descenso do 1,5 por cento ó contabilizarse 339 menos que o ano anterior. Esta diminución foi propiciada polo menor número de roubos de vehículos, o roubo con forza en establecementos e os furtos.

Con todo, aumentaron os delitos contra a vida, a integridade e a liberdade persoal, que se incrementaron nun 6,8%. Antón Louro especificou que sobre todo se debeu ó crecemento do 25,1% dos delitos de malos tratos físicos e psíquicos e ó aumento dos que o Código Penal cualifica como de corrupción de menores, que creceron un 90,9 por cento. O delegado do Goberno quixo aclarar que aínda que a porcentaxe é moi elevada, en números absolutos estes delitos chegaron a 21 en Galicia durante o ano pasado e subida que se debeu ó incremento da capacidade investigadora sobre todo nos delitos de carácter informáticos e a un maior número de denuncias por parte dos afectados.

Pero pola contra, sempre segundo os datos que ofreceu o delegado do Goberno en Galicia, os asasinatos e homicidios descenderon un 7,1 por cento o ano pasado.

En 2009 a Policía Nacional e a Garda Civil de Galicia esclareceron un 55,4 por cento dos delitos, unha taxa 15 puntos por encima da media nacional e un 3,3% maior que a de 2008. En canto á taxa de detidos, Galicia sitúase na media de España cunha taxa de 172 detencións por cada mil infraccións penais coñecidas durante o ano pasado.

O delegado, finalmente, recoñeceu o esforzo do Ministerio do Interior co incremento de efectivos de Policía Nacional e Garda Civil, un 24,4 por cento máis ó longo dos últimos sete anos, asegurou.