Xoves 02.09.2010
| Actualizado 18.54
Hemeroteca web
|
RSS
RSS
|
 |
| Manuel Fraga, de costas, no seu chalé, en Perbes (Miño), no que sempre pasa as vacacións de verán FOTO: AGN |
O portavoz do Grupo Parlamentario do Bloque Nacionalista Galego (BNG), Carlos Aymerich, criticou onte que "seis axentes da Garda Civil estean dedicados diariamente" a vixiar o chalé que ten no municipio coruñés de Miño o ex presidente da Xunta e actual senador polo Partido Popular (PP), Manuel Fraga, e preguntouse se é "unha prebenda máis na lei de ex presidentes" que impulsa o Goberno galego e que, en principio, non conta co apoio dos nacionalistas.
Na Comisión Institucional do Parlamento galego, Aymerich opúxose á proposición do Grupo Popular para incrementar a dotación de recursos e materiais dos cuarteis da Garda Civil na comarca da Coruña, e preguntouse se os populares pretenden aumentar o número de axentes "para vixiar o chalé de Perbes".
O deputado nacionalista recordou que a vivenda só está ocupada polo ex presidente do PPdeG e da Xunta "un mes no verán" e lamentou que seis axentes da Garda Civil de Betanzos, Miño, Oleiros e Sada realizan diariamente labores de vixilancia no lugar, "un servizo que podería prestar a seguridade privada", segundo considera o parlamentario frontista.
Ameazas de criminalidade ou inseguridade
Fronte a iso, Carlos Aymerich considerou máis necesario incrementar o persoal do Seprona, xa que só 130 axentes pertencen a este grupo en Galicia. Ademais, criticou que o PP "intente chegaró Goberno dacabalo de ameazas" como a criminalidade ou a inseguridade cidadá, "tan propio da extrema dereita".
Ante a reacción dos populares a esta acusación, Aymerich reafirmouse e asegurou que o deputado do PPdeG, Diego Calvo, riuse da súa afirmación porque "se dá por aludido". "Efectivamente, ía por el", sentenciou Aymerich.
A deputada popular Beatriz Mato solicitara "máis recursos e máis efectivos" para a Garda Civil na área da Coruña, ata lograr un cociente dun axente en activo por cada mil habitantes.
O grupo parlmentario do PSdeG uniuse ó Bloque Nacionalista no rexeitamento a esta proposta e a deputada socialista Beatriz Sestayo asegurou que o cociente da Garda Civil na provincia da Coruña era no ano 2005 de 1,3 axentes por cada mil habitantes.
Insisten en que os ex presidentes non se incorporen ó Consultivo
O voceiro do BNG no Congreso, Francisco Rodríguez, rexeitou onte a proposta do conselleiro da Presidencia, o socialista José Luís Méndez Romeu, de incorporar os ex presidentes da Xunta como membros natos do Consello Consultivo.
Rodríguez considerou que "non é positivo" incluír ós ex presidentes no Consello Consultivo, "nin en calquera outro organismo autonómico", porque segundo apuntou, "teñen un papel político importante". "Se os metes nestas institucións estalos a converter en reféns de determinadas concepcións políticas", agregou.
Por iso, manifestouse partidario de que sexan os grupos parlamentarios os que cheguen a un acordo unánime sobre o futuro status dos ex presidentes, que inclúa un soldo. "Non pasa nada porque teñan asignado un soldo pero sen esas argalladas de organismos e sen referencias políticas", concluíu.
