O portavoz nacional do Bloque Nacionalista Galego, Anxo Quintana, diríxese ante os simpatizantes congregados onte na Quintana para celebrar o Día da Patria FOTO: RAMÓN ESCUREDO

"Hoxe somos un pouco máis nación". Así o asegurou onte o portavoz nacional do Bloque Nacionalista Galego, Anxo Quintana, no tradicional discurso do Día da Patria, no que marcou o reto de converter o BNG nunha forza decisiva para o futuro Goberno central e lograr nun futuro non afastado un verdadeiro Estatuto de primeira para Galicia. "Nunca gobernamos tanto e a tantos, nunca puidemos facer tanto por tantos e nunca tivemos tantas oportunidades de facer nación a diario", recalcou o líder nacionalista e vicepresidente da Xunta ante 25.000 simpatizantes que se congregaron na praza da Quintana tras percorrer as principais rúas de Compostela.

Baixo o lema A forza que fai país, a mobilización nacionalista partiu, pasadas as doce da mañá, da Alameda compostelá co propio Quintana á cabeza, acompañado de Xosé Manuel Beiras, que este ano volveu á primeira liña da manifestación, tras anos participando como un militante máis. Os catro conselleiros nacionalistas, deputados parlamentarios e representantes municipais de todos os concellos onde está presente o BNG acudiron ó acto no que se reivindicou a construción dunha "nación galega firme, segura, orgullosa e respectada".

Reivindica o dereito á autodeterminación

Por iso, Quintana reivindicou o dereito de autodeterminación, "non coma un feito puntual nin como unha decisión plebiscitaria", senón como un proceso dinámico para acadar cada día maior capacidade de autoorganización e maiores cotas de autogoberno.

A pesar do fracaso da reforma estatutaria, o líder do BNG asegurou que se deu "un paso adiante sen volta atrás na construción nacional de Galiza", ó tempo que renovou o compromiso do seu partido para acadar un Estatuto de primeira con identidade propia: "Galiza é hoxe máis nación, aínda sen estatuto porque somos máis os que queremos que teña o Estatuto de Nación que merece e precisa", setenciou.

Neste punto, cominou os votantes do PPdeG para que "non renuncien os seus soños e camiñen xunto a nós en nome do sentimento por este país".

O líder nacionalista fixo referencia tamén ás vindeiras eleccións xerais, na que o BNG pretende conseguir unha "representación decisiva", para que o nacionalismo galego pese e decida na política estatal e conseguir un estado plurinacional conformado por nacións libres e iguais que libremente deciden cooperan entre si e onde o nacionalismo deixe de estar "estigmatizado".

Así lle advertiu ó Executivo central que o seu apoio ós próximos Presupostos Xerais do Estado está condicionado ó cumprimento por parte do goberno de ZP dos seus compromisos en materia de infraestruturas, benestar, fenda dixital e desequilibro territorial. "Non puideron despachar este país cun estatuto de segunda e non van poder despacharnos cuns orzamentos do Estado que traten a Galiza coma un país de segunda", clamou Quintana. Neste sentido, asegurou que o BNG será o único que poida manter co Goberno unha negociación "entre iguais", xa que tanto o PSdeG como o PPdeG xa decidiron o seu voto antes de ver as cifras finais dos investimentos do Estado.

Gañar "voto a voto" a relevancia que temos que ter

Por todo iso, Anxo Quintana convidou todos os presentes a traballar sen descanso para gañar "voto a voto" a relevancia que Galiza ten que ter. "Unha forza política que non se alimenta dos seus soños acaba sendo inútil para a nación á que pretende servir. É tempo de alimentarnos dos nosos soños e de que eses soños se fagan realidade convertendo a Galiza na nación forte e firme que queremos", setenciou Quintana entre a ovación dos miles de simpatizantes que botaron abaixo a praza compostelá.