Bandeiras españolas de todos os tamaños víronse onte no Obradoiro, durante unha concentración, e tamén nas ventás dalgunhas casas do núcleo histórico compostelán FOTO: RAMÓN ESCUREDO

Unhas 30 persoas acudiron onte en Santiago de Compostela á concentración convocada por Novas Xeracións (NNXX) do Partido Popular (PP) na que se leu un manifesto en defensa da bandeira española como símbolo da "soberanía, integridade e unidade de España".

No acto, organizado na Praza do Obradoiro con motivo do Día da Hispanidade, o portavoz do grupo municipal do PPdeG en Compostela, Gerardo Conde Roa, foi o encargado da lectura do texto co que NNXX pretende "animar os composteláns para que utilicen os símbolos patrios por encima de calquera ideoloxía".

O manifesto sitúa o significado da bandeira como "símbolo de nación, soberanía, integridade, independencia, unidade e integridade da patria e que representa os valores contidos na Constitución". Conde Roa, arroupado polas persoas que acudiron á convocatoria con bandeiras españolas, continuou coa lectura dun texto co que as NNXX pretendían "salientar" a "esixencia legal, ratificada polo Tribunal Supremo, de que a bandeira ondee todos os días nos estamentos, de acordo cos valores, principios, dereitos e deberes constitucionais que a propia bandeira representa".

Ademais, o escrito defende que hai que "render homenaxe respectuoso aqueles símbolos" que proporcionan "a sensación de benestar, confianza, seguridade e garantía de convivencia pacífica e harmonía".

O manifesto do PP asegura que a bandeira española -"coas súas cores e o seu escudo"- exhibe "ante todos e ante o mundo o orgullo de pertencer a unha democracia amparada nos valores constitucionais da liberdade, a xustiza, a igualdade, o pluralismo, o respecto á lei e ao dereito".

Continuando coa lectura, Conde Roa proclamou que a bandeira española, o himno nacional, a constitución e a monarquía son "símbolos que unen" e, por este motivo, "xeran respecto" polas particularidades dos demais municipios e doutras comunidades autónomas distintas á nosa.

O texto argumentaba tamén que "grazas a estes alicerces" os españois están "seguros de compartir os mesmos valores e percorrer un mesmo camiño de ilusión e esperanza no futuro". A lectura do manifesto concluíu con proclamas de "Viva España!".

O acto foi presenciado, desde a escalinata da Catedral de Santiago, por un grupo de mozos que portaban unha bandeira de Galicia co escudo de Castelao para unha República galega e outra estreleira, como símbolo de liberación nacional e social.

Ó finalizar, este grupo de mozos lanzoulles mensaxes ás preto de 30 persoas que se reuniron no Obradoiro, o que deu lugar a un careo de consignas sen ningún tipo de actitude violenta por ningunha parte dos dous grupos.

Así, proclamáronse frases como "a solución é a autodeterminación", "independencia", "Galicia ceive poder popular", por parte dos mozos nacionalistas; e "España é unha e non cincuenta e unha", desde o grupo dos simpatizantes e militantes do Partido Popular.