O deputado do PPdeG, Xesús Palmou, expuxo onte unha interpelación no Parlamento galego para lograr un pacto pola xustiza, que permita establecer medidas que solucionen a situación de pendencia dos xulgados galegos.

No debate, no entanto, non foi apoiado por PSdeG e BNG, que instaron os populares para impulsar unha reforma do Estatuto de Galicia. Así, o conselleiro de Presidencia, José Luís Méndez Romeu, felicitou o PP por sumarse á "cultura dos pactos", claro que considera necesario saber se isto tamén o aplicarán para reformar o texto estatutario. A deputada socialista Beatriz Sestayo incidiu neste tema, asegurando que "o pacto en materia de Xustiza era o Estatuto de Autonomía", que o PP boicoteou.

Pola súa banda, o deputado do BNG, Iago Tabarés, considerou fundamental o acordo para un novo Estatuto, que podería favorecer a creación dun Consello Xudicial Galego para abordar estes problemas.

O asunto da xustiza, no debate parlamentario, tornouse nun cruzamento de acusacións e comparativas entre os gobernos do PP e o actual bipartito. A xuízo de Palmou, urxe pór en marcha 33 novas unidades xudiciais (17 xulgados e 19 prazas de maxistrados) así como elevar os xulgados específicos de violencia de xénero. É, indica, a demanda do Tribunal Superior de Xustiza de Galicia. Tamén aludiu a que 32.000 asuntos que antes eran infraccións administrativas agora van pola vía penal, a través das reformas de Tráfico, o que aumenta a saturación dos xulgados. Palmou pide, novas unidades xudiciais -entre elas un xulgado mercantil para Vigo-, e máis edificios xudiciais.

Pola súa banda, o conselleiro, Méndez Romeu, reprochoulle aos populares e en concreto a Palmou que, no seu período como conselleiro, a pendencia era superior á actual. Ademais, sinalou, co PP en España e Galicia creáronse 18 unidades xudiciais, "tres a iniciativa de vostede", con alusión a Palmou; mentres que co PSOE en ambos os gobernos van, coas previstas agora, "44 unidades xudiciais".

Tabarés reprochoulles aos populares a súa falta de rigor en materia de xustiza e acusounos de responsabilizar ao "bipartito" de cuestións que dependen do Ministerio de Xustiza. Respecto das críticas de Palmou, que sinalaba que non hai Consellería de Xustiza, Tabarés recordou que a comunidade nunca tivo tal Consellería pero lle espetou que "un dous seus mellores anos" como conselleiro (dixo a Palmou) obtivo peores resultados "que na actualidade".