Xoves 02.09.2010
| Actualizado 18.54
Hemeroteca web
|
RSS
RSS
|
 |
| Anxo Quintana, acompañado por Suárez Canal e Teresa Táboas, á esquerda, e Ana Pontón e Fernando Blanco |
O voceiro nacional do BNG, Anxo Quintana, adiantou onte que o BNG fará unha "campaña en positivo" na que presentará as súas propostas á "maioría social do país, ós que son nacionalistas e ós que non o son, ós que falan en galego e ós que falan en castelán", para ofrecerlles unha alternativa nacional galega, de progreso, benestar e orgullo da identidade, da cultura e do idioma".
Quintana informou de que o Consello Nacional celebrado onte aprobou con "case o 85%" dos apoios ás listas e o programa electoral da formación, de forma que dá por iniciada a precampaña cara ás eleccións galegas do 1 de marzo. Así, asegurou que a aposta do BNG é por unha "campaña en positivo e de propostas", polo que recomendou que "ninguén espere descualificacións das propostas dos demais".
O líder nacionalista emprazou a ambos os dous partidos a "aproveitar" as visitas dos seus líderes estatais -Mariano Rajoy (PP), onte en Lugo, e José Luis Rodríguez Zapatero (PSdeG), hoxe en Ourense-, para facer as súas propostas sobre a reforma do Estatuto, por exemplo. "Sería unha gran noticia que nos enchería a todos de ilusión que o señor Rajoy nos anuncie que vai retirar o seu bloqueo ao novo estatuto e o señor Zapatero diga claro e alto que lle vai recoñecer a Galicia o mesmo status que recoñeceu para Cataluña", resumiu.
Quintana prometeu que o BNG afondará nos cambios levados a cabo nesta lexislatura e defendeu que as listas electorais son "froito dun proceso democrático", no que os militantes foron "moi participativos" e co que se mostrou "unha gran cohesión" no seo da formación. En canto á ausencia da conselleira de Cultura, Ánxela Bugallo, nas listas, o líder do BNG trasladou a decisión ás propostas das bisbarras e asegurou que "segue sendo unha destacada membro do BNG".
"Eles verán", di sobre o debate a dous
Anxo Quintana advertiu onte de que se hai un debate a dous entre os líderes do PPdeG e do PSdeG, Alberto Núñez Feijóo e Emilio Pérez Touriño respectivamente, "non pasa nada" para o BNG, xa que os que "van quedar nunha situación moi difícil de explicar" serán tanto os organizadores como os participantes. En resposta a preguntas dos xornalistas acerca das declaracións de Touriño, que indicou o venres que debaterá "de todas as formas necesarias", o tamén vicepresidente da Xunta insistiu en que a sociedade "non "vai entender" un cara a cara no que "falta un", polo que dixo que "eles verán". "Adiante", afirmou o voceiro nacional do BNG, en relación con esta posibilidade. Así, agregou que el acudirá a "todos os debates" aos que sexa invitado porque "é unha norma democrática do BNG".
Ana Pontón ocupa o posto da responsable de Cultura
A Executiva do BNG deseñou, tras as propostas das asembleas comarcais, unhas listas electorais que presentan un 30% de nomes que non apareceran nos postos de saída das galegas de 2005.
Pontevedra é a provincia con máis novidades, cunha lista encabezada pola conselleira de Vivenda, Teresa Táboas, á que lle segue un membro da UPG da comarca de Vigo, Henrique Viéitez. De número 3, Carme Adán; 4, Bieito Lobeira; 5, Carme da Silva; 6, Xosé Ramón Paz; 7, Montse Prado Cores; 8, Roberto Mera; 9, Iria Aboi; e 10, Xosé Manuel Méndez Díaz.
A lista da Coruña está encabezada por Quintana e, de número dous, no posto que no 2005 ocupou Ánxela Bugallo, agora vai a deputada Ana Pontón, tamén da UPG. Carlos Aymerich ocupa o terceiro posto e Ana Luisa Bouza, unha das grandes novidades, o cuarto. O 5 é para Fernando Blanco Parga; 6, Pura Ferreño;. 7, Manuel Antelo; 8, Dominga Brión; 9, Xosé Regueira; e 10, Rosário Fernández Velho.
A candidatura de Lugo encabézaa o conselleiro de Industria, Fernando Blanco, ó que lle seguen Isabel Sánchez Montenegro, Manuel Parga Núñez, Esther López Rodríguez, Balbino Fernández López e Cristina Ferreiro López.
En Ourense, a lista lidéraa o conselleiro de Medio Rural, Alfredo Suárez Canal, e Iago Tabarés (deputado e cabeza de lista no 2005) vai para o terceiro posto. O segundo é para Tareixa Paz e o resto complétanos Isabel Gacio, Anxo Collarte Pérez e Tereixa Devesa.
