O PPdeG realiza un balance positivo do "máxico" 2009

Feijóo, satisfeito cos resultados obtidos polo PP nas eleccións galegas FOTO: J.J. Guillén/EFE

O PPdeG remitiu onte un comunicado no cal realiza o seu paricular balance do ano 2009 que está a piques de acabar. Os populares salientes que "pechan desde o Goberno" autonómico "un ano que comezaron desde a oposición nunha Galicia que antes tiña 14 conselleiros en dous Gobernos distintos e agora ten 10 cun só referente, nun territorio que antes era coñecido polo luxo e o desbaldimento da súa clase dirixente e agora é recoñecido polo seu rumbo firme cara á modernidade".

O partido que está á fronte da Xunta de Galicia considera que o 2009 foi "un ano máxico" porque supuxo a volta ó Goberno galego da súa formación, nas eleccións celebradas o 1 de marzo, xusto tres anos e medio despois de que Manuel Fraga perdera o poder en San Caetano. Así, destaca que, "pese ás malas noticias como o número de parados e as noticias negativas que chegan desde Madrid, como a subida de impostos ou os agravios comparativos con outras comunidades", merece a pena facer "un balance positivo do ano que termina" no sentido de que lograron sacar do executivo autonómico ó bipartito formado por PSdeG e BNG. Os populares galegos resumen en dúas as boas noticias xeradas pola Xunta aos cidadáns galegos neste ano: a austeridade e a eficiencia no gasto público e a volta á normalidade lingüística coa fin das imposicións. O PPdeG lembra que este ano pecharon consellerías, "repercutindo en destinar o diñeiro que antes incidía no nivel de vida dos políticos agora en gasto social".

"O Goberno galego sacou a Galicia das portadas dos diarios nacionais por temas como o desbaldimento de diñeiro público en mojitos, limusinas e mobles de luxo e colocouna polo seu rumbo decidido cara á modernidade e máis ás portas de iniciar un Ano Santo que pode ser clave para o futuro económico e social de Galicia", aseguran.

Non obstante, o PPdeG quere deixar claro que non caerá na autocompracencia no ano que entra e, por iso, quere lanzar unha mensaxe clara a toda a cidadanía galega: pese aos "moitos avances" adoptados, segundo eles, nos oito meses de Goberno de Alberto Núñez Feijóo e pese ao "lavado de cara que se lle deu ao país", o mellor da Xunta "está por chegar e o mellor de Galicia tamén".

Neste sentido, o PPdeG agarda que 2010 sexa "un verdadeiro ano 10 para Galicia" no que "a batalla que libramos de xeito profundo e inequívoco contra a crise económica se materialice en tramos definitivos que nos permitan saír dunha vez por todas do túnel no que estamos inmersos", conclúen.